કચ્છ જિલ્લાના ભચાઉ શહેરમાં આવેલા માનસરોવર વિસ્તારમાં એક મકાનમાં અચાનક ભીષણ આગ લાગવાની ગંભીર ઘટના સામે આવી છે. મકાનમાં ચાલુ એસી (AC) માં ધડાકાભેર બ્લાસ્ટ થવાના કારણે ક્ષણવારમાં આગે રૌદ્ર સ્વરૂપ ધારણ કરી લીધું હતું. જોતજોતામાં આગ આખા મકાનમાં પ્રસરી જતાં વિસ્તારમાં ભારે અફરાતફરી અને અફરાતફરીનો માહોલ સર્જાયો હતો.
ભારે જહેમત બાદ આગ પર કાબૂ મેળવ્યો
આગના બનાવ અંગે તાત્કાલિક જાણ કરવામાં આવતાં ભચાઉ નગરપાલિકાની ફાયર બ્રિગેડની ટીમ ત્વરિત ઘટનાસ્થળે દોડી આવી હતી. ફાયર ફાઈટરોએ સતત 3 કલાક સુધી પાણીનો મારો ચલાવીને મોટો અગ્નિશામક ઓપરેશન હાથ ધર્યો હતો. ફાયર ટીમના સઘન પ્રયાસો બાદ અંતે આગ પર સંપૂર્ણ કાબૂ મેળવવામાં સફળતા મળી હતી, જેના કારણે આસપાસના અન્ય મકાનો આગની ઝપેટમાં આવતા બચી ગયા હતા.