ગાંધીધામ અને તેની આસપાસના ગ્રામ્ય વિસ્તારોમાં સરકારી કિંમતી જમીનો પર ગેરકાયદે કબજા જમાવવાની પ્રવૃત્તિ સામે વહીવટી તંત્રએ લાલ આંખ કરી છે. ગાંધીધામના મહેસૂલ વિભાગ અને સ્થાનિક પોલીસ તંત્ર દ્વારા સંયુક્ત રીતે અલગ-અલગ લોકેશનો પર એક મોટું જમીન સેનિટેશન ડ્રાઈવ (ડિમોલિશન) હાથ ધરવામાં આવ્યું હતું, જેનાથી સ્થાનિક ભુમાફિયાઓમાં ભારે ફફડાટ વ્યાપી ગયો છે.
ગેરકાયદે બાંધકામો પર હથોડો
લાંબા સમયથી વહીવટી તંત્રને ફરિયાદો મળી રહી હતી કે ગાંધીધામ પંથકના શિનાઈ અને ભારાપર જેવા વિસ્તારોમાં કરોડો રૂપિયાની કિંમતી સરકારી અને ગૌચર જમીનો પર સ્થાનિક તત્વો દ્વારા આડેધડ કાચા-પાકા મકાનો, ઓરડીઓ અને કોમર્શિયલ શેડ ઉભા કરી દેવામાં આવ્યા છે. એટલું જ નહીં, શિનાઈ પાસે કાયદાકીય ઓથ મેળવવાના આશયથી એક ધાર્મિક દબાણ પણ ખડકી દેવાયું હતું. આ બાબતની ગંભીરતાને ધ્યાને રાખીને ગાંધીધામ મામલતદારની આગેવાની હેઠળ શનિ-રવિની મોડી રાત્રે જ ઓપરેશન પ્લાન કરવામાં આવ્યું હતું.
