કચ્છ જિલ્લાના ભચાઉ તાલુકાના સામખિયાળી ગામે આવેલા જંગી રોડ વિસ્તારમાં મોડી રાત્રે એક રહેણાંક મકાનમાં અચાનક ભીષણ આગ લાગવાની ઘટના સામે આવી છે. મકાનમાં શોર્ટ સર્કિટ થવાના કારણે આ આગ લાગી હતી. જોતજોતામાં આગે રૌદ્ર સ્વરૂપ ધારણ કરી લેતાં આસપાસના વિસ્તારમાં ભારે અફડાતફડી અને દોડધામ મચી ગઈ હતી. સ્થાનિક લોકોએ તાત્કાલિક એકઠા થઈને વહીવટી તંત્રને જાણ કરી હતી.
112 અને ફાયર બ્રિગેડની ટીમે હાથ ધર્યું રેસ્ક્યૂ
ઘટનાની જાણ થતાં જ ઇમરજન્સી સર્વિસ 112ની ટીમ અને ભચાઉ ફાયર બ્રિગેડનો કાફલો તાત્કાલિક સ્થળ પર પહોંચી ગયો હતો. ફાયર ફાઇટરોએ સતત એક કલાકની ભારે જહેમત અને પાણીના મારા બાદ આખરે આગ પર પૂર્ણ કાબૂ મેળવ્યો હતો. સદનસીબે આ ભયાનક અકસ્માતમાં કોઈ મોટી જાનહાનિ થવા પામી નથી, જેના કારણે તંત્ર અને સ્થાનિક રહીશોએ મોટી રાહતનો શ્વાસ લીધો છે.