કચ્છ જિલ્લામાં ખનિજ માફિયાઓ સામે વહીવટી તંત્ર દ્વારા સકંજા કસવામાં આવી રહ્યો છે. અબડાસા તાલુકાના કોઠારા અને ભેદી ગામની સીમમાંથી પસાર થતા નદી વિસ્તારમાં મોટા પાયે ગેરકાયદેસર ખનન અને વહન પ્રવૃત્તિ ચાલી રહી હોવાની બાતમી મળી હતી. આ બાતમીના આધારે ખનિજ વિભાગની ફ્લાઈંગ સ્ક્વોડની ટીમ દ્વારા અચાનક દરોડો પાડવામાં આવ્યો હતો, જેનાથી રેતી ચોરી કરતા તત્વોમાં ભારે નાસભાગ મચી ગઈ હતી.
સાદી રેતીનું ગેરકાયદે શોષણ અને વાહનો કબજે
તપાસ દરમિયાન નદીના પટમાંથી સાદી રેતીનું ગેરકાયદેસર ઉત્ખનન કરીને તેનું વહન કરવામાં આવી રહ્યું હોવાનું સ્પષ્ટ થયું હતું. ફ્લાઈંગ સ્ક્વોડની ટીમે સ્થળ પરથી ગેરકાયદે પ્રવૃત્તિમાં વપરાતા વાહનો અને મશીનરી જપ્ત કરવાની કાર્યવાહી હાથ ધરી હતી. આ દરોડામાં 1 લોડર, 1 ડમ્પર અને 1 ટ્રક સહિત કુલ અંદાજે રૂપિયા 50 લાખની કિંમતનો મુદ્દામાલ જપ્ત કરવામાં આવ્યો છે.