કચ્છ જિલ્લાના ભચાઉ તાલુકાના જૂના કટારિયા ગામની સીમ વિસ્તારમાં પોલીસે દારૂના ગેરકાયદેસર કારોબાર પર મોટો પ્રહાર કર્યો છે. બાતમીના આધારે લકડિયા પોલીસ અને બોર્ડર રેન્જ ક્રાઈમ શાખાની ટીમે સંયુક્ત રીતે હાથ ધરેલા દરોડા દરમિયાન દારૂનું કટિંગ થઈ રહ્યું હતું ત્યારે જ દરોડો પાડીને મોટી સફળતા મેળવી છે. આ કાર્યવાહીથી સ્થાનિક સ્તરે બુટલેગરોમાં ફફડાટ વ્યાપી ગયો છે.
વાહનો સહિત રૂ. 63.41 લાખનો મુદ્દામાલ જપ્ત
દરોડા દરમિયાન પોલીસે ઘટનાસ્થળેથી ભારતીય બનાવટના વિદેશી દારૂનો રૂ. 30.41 લાખનો જંગી જથ્થો જપ્ત કર્યો છે. આ ઉપરાંત દારૂની હેરાફેરી અને કટિંગ માટે ઉપયોગમાં લેવાતી 3 કાર તથા ટ્રોલી સાથેનું એક ટ્રેક્ટર પણ કબજે કરવામાં આવ્યું છે. દારૂ અને વાહનો મળીને પોલીસે કુલ રૂ. 63.41 લાખનો કિંમતી મુદ્દામાલ પોતાના કબજે લીધો છે.
