દિવાળીના પવિત્ર તહેવાર પહેલાં ગુજરાતમાં દારૂબંધીના દાવાઓની પોલ ખોલતી એક અત્યંત સનસનીખેજ ઘટના કચ્છ જિલ્લામાંથી સામે આવી છે. સ્ટેટ મોનિટરિંગ સેલ (SMC) ની ટીમે કચ્છના સંવેદનશીલ ગણાતા માધાપર વિસ્તારમાં ઓચિંતો મોટો દરોડો પાડ્યો હતો. આ રેડ દરમિયાન ખાલી ખોખાંની આડમાં દિલ્હી અને ગુડગાંવથી મંગાવવામાં આવેલો લાખો રૂપિયાનો વિદેશી દારૂ ઝડપાઈ જતાં પશ્ચિમ કચ્છ પોલીસ બેડામાં ભારે ખળભળાટ મચી ગયો છે. લાંબા સમયથી ફરાર ચાલી રહેલો કુખ્યાત લિસ્ટેડ બૂટલેગર પણ પોલીસના સકંજામાં આવી ગયો છે.
311 પેટીમાંથી 8,343 વિદેશી દારૂની બોટલો અને બિયર જપ્ત
પ્રાપ્ત વિગતો અનુસાર, SMCની ટીમે બાતમીના આધારે માધાપર ખાતે હાથ ધરેલી આ સફળ ઓપરેશનમાં ટ્રકમાંથી વિદેશી દારૂની કુલ 311 પેટીઓ, જેમાં અલગ-અલગ બ્રાન્ડની 8,343 બોટલો અને બિયરના ટીન કબજે કર્યા છે. પકડાયેલા આ દારૂની કુલ બજાર કિંમત આશરે 32.63 લાખ રૂપિયા થાય છે. આ ઉપરાંત દારૂની હેરાફેરીમાં વપરાતી બે કિયા કાર, એક આઈ-20 કાર, ટુ-વ્હીલર, મોબાઈલ ફોન અને ટ્રક સહિત કુલ 74.13 લાખ રૂપિયાનો મસમોટો મુદ્દામાલ જપ્ત કરવામાં આવ્યો છે.
ખાલી ખોખાંની આડમાં દિલ્હી અને ગુડગાંવથી મંગાવાતો દારૂ
આરોપીઓ પોલીસની કડક નજર અને ચેકિંગથી બચવા માટે અત્યંત ચાલાકીપૂર્વક ખાલી ખોખાં (કાર્ટૂન) ની આડમાં ટ્રકમાં છુપાવીને વિદેશી દારૂની હેરાફેરી કરતા હતા. પ્રાથમિક તપાસમાં ખુલાસો થયો છે કે આ ભારી માત્રામાં દારૂનો જથ્થો ખાસ કરીને દિલ્હી અને ગુડગાંવ જેવા વિસ્તારોમાંથી મંગાવવામાં આવતો હતો અને કચ્છના વિવિધ સ્થળોએ સપ્લાય થતો હતો.
લિસ્ટેડ બૂટલેગર અનિલસિંહ જાડેજા ઝડપાયો
આ દરોડા દરમિયાન SMCની ટીમે કુખ્યાત અને કરોડોના દારૂના ગુનાઓમાં લાંબા સમયથી વોન્ટેડ એવા લિસ્ટેડ બૂટલેગર અનિલસિંહ જાડેજા સહિત કુલ ચાર આરોપીઓને રંગેહાથ ઝડપી લીધા છે. જોકે, માધાપરનો અન્ય એક બૂટલેગર કુલદીપ દરોડા દરમિયાન નાસી છૂટવામાં સફળ રહ્યો હતો. દારૂ મોકલનાર, પકડાયેલા અને ફરાર શખ્સો સહિત કુલ 20 શખ્સો સામે ગુનો નોંધીને કાયદેસરની સઘન કાર્યવાહી હાથ ધરવામાં આવી છે. અગાઉ પણ અનિલસિંહ સામે અનેક ગંભીર ગુનાઓ નોંધાયેલા હોવા છતાં તેની ધરપકડ ન થવાને કારણે સ્થાનિક પોલીસની ભૂમિકા સામે અનેક સવાલો પણ ઉભા થયા છે. SMCની આ કડક કાર્યવાહીથી તહેવારોની મોસમમાં બૂટલેગરોમાં ફફડાટ વ્યાપી ગયો છે.
ગુજરાતના વધુ સમાચાર વાંચવા માટે ક્લિક કરો
