મહીસાગરમાંથી એક અત્યંત ચોંકાવનારી અને કાળજું કંપાવી મૂકે તેવી હિટ એન્ડ રનની ઘટના સામે આવી છે. જ્યાં માર્ગ પરથી પસાર થઈ રહેલી બે મહિલાઓને એક બેફામ ગતિએ આવી રહેલી કારના ચાલકે જોરદાર ટક્કર મારી હતી. આ અકસ્માત એટલો પ્રચંડ હતો કે કારની ટક્કર વાગતા જ બંને મહિલાઓ હવામાં ફંગોળાઈને રોડ પર પટકાઈ હતી. અકસ્માત સર્જ્યા બાદ માનવતા નેવે મૂકીને કારચાલક પોતાની કાર સાથે ઘટનાસ્થળેથી પૂરપાટ ઝડપે ફરાર થઈ ગયો હતો. આ અકસ્માતના રૂંવાડા ઊભા કરી દે તેવા દૃશ્યો નજીકમાં લાગેલા સીસીટીવી (CCTV) કેમેરામાં કેદ થઈ ગયા છે.
બજારથી ઘરે પરત ફરતી વખતે નડ્યો કાળ
ભોગ બનનાર મહિલાઓ બજારમાંથી પોતાના ઘરે પરત ફરી રહી હતી. બરાબર એ જ સમયે કાળ બનીને આવેલી બેફામ કારે તેમને અડફેટે લીધી હતી. આ અકસ્માતમાં બંને મહિલાઓ ગંભીર રીતે ઇજાગ્રસ્ત થઈ ગઈ હતી અને રોડ પર લોહીલુહાણ હાલતમાં તરફડવા લાગી હતી. સ્થાનિક લોકોએ તાત્કાલિક ધોરણે આ અંગેની જાણ 108 એમ્બ્યુલન્સ સેવાને કરી હતી. 108ની ટીમ ઘટનાસ્થળે દોડી આવી હતી અને ગંભીર હાલતમાં રહેલી બંને મહિલાઓને તાત્કાલિક સારવાર અર્થે નજીકની સરકારી હોસ્પિટલમાં ખસેડી હતી, જ્યાં હાલ તેમની સારવાર ચાલી રહી છે.