મહિસાગર જિલ્લામાં ગેરકાયદે વિદેશી દારૂની હેરાફેરી અને વેચાણ સામે મહિસાગર એલ.સી.બી. (LCB) પોલીસે મોટી સફળતા મેળવી છે. કોઠંબા પોલીસ સ્ટેશનના હદ વિસ્તારમાં આવેલા ખેમપુર ગામે ડાહ્યાભાઈ બારીયા નામના શખ્સે પોતાના ખેતરમાં ગેરકાયદે વિદેશી દારૂનો મોટો જથ્થો સંતાડ્યો હોવાની ચોક્કસ બાતમી LCB ટીમને મળી હતી. આ બાતમીના આધારે પોલીસે દરોડો પાડીને ખેતરમાંથી દારૂનું વેચાણ કરી રહેલા એક શખ્સની સ્થળ પરથી જ ધરપકડ કરી હતી.
607 નંગ વિદેશી દારૂની બોટલો કબ્જે કરાઈ
પોલીસે ખેતરમાં હાથ ધરેલી સઘન તલાશી દરમિયાન છુપાવવામાં આવેલી વિદેશી દારૂની કુલ 607 નંગ બોટલો મળી આવી હતી. મહિસાગર LCB એ સ્થળ પરથી રૂ.1,53,000ની કિંમતનો વિદેશી દારૂનો તમામ જથ્થો જપ્ત કર્યો હતો. દારૂના કાળા કારોબારમાં સંકળાયેલા આરોપીને અટકાયતમાં લઈને આગળની કાયદેસરની કાર્યવાહી હાથ ધરવામાં આવી છે.