મહિસાગર જિલ્લામાં પવિત્ર શ્રાવણ માસ દરમિયાન ગેરકાયદેસર રીતે ચાલતી જુગારની પ્રવૃત્તિઓ પર પોલીસે લાલ આંખ કરી છે. જિલ્લા એલસીબી (LCB) ની ટીમે ચોક્કસ બાતમીના આધારે દરોડો પાડીને જાહેર જગ્યામાં પાના ટીચતા જુગારીઓને ઝડપી લીધા છે. પોલીસની આ અચાનક કાર્યવાહીથી સ્થાનિક જુગારીયા તત્વોમાં ભારે ફફડાટ વ્યાપી ગયો છે.
જાહેર જગ્યામાં ચાલતી હતી જુગારની મહેફિલ
મળતી માહિતી મુજબ, સંતરામપુર તાલુકાના સાંગવાડા ગામ નજીક ખુલ્લી જગ્યામાં કેટલાક ઈસમો એકઠા થઈને જુગાર રમી રહ્યા હોવાની ગુપ્ત બાતમી એલસીબી ટીમને મળી હતી. બાતમીના આધારે પોલીસે સ્થળ પર દરોડો પાડ્યો હતો. દરોડા દરમિયાન દાવ પર રકમ લગાવીને જુગાર રમી રહેલા 10 ઈસમોને પોલીસે રંગેહાથ ઝડપી પાડ્યા હતા.