મહેસાણા જિલ્લામાં સાબરમતી નદીના પટમાંથી ચાલી રહેલા ગેરકાયદેસર ખનન અને રેતી ચોરીના કારોબાર સામે ખાણ ખનિજ વિભાગે લાલ આંખ કરી છે. જિલ્લાના વિજાપુર તાલુકાના ફૂદેડા ગામે સાબરમતી નદીના પટમાં ચાલતા ગેરકાયદેસર સાદી રેતીના ખાણકામ પર ખાણ ખનિજ વિભાગની ટીમે સરપ્રાઈઝ ચેકિંગ હાથ ધરીને મોટી કાર્યવાહી કરી છે. આ દરોડા દરમિયાન વિભાગ દ્વારા 1.20 કરોડની કિંમતના વાહનો ઝડપી પાડવામાં આવ્યા છે.
ગેરકાયદેસર રીતે સાદી રેતીનું ખનન
ફૂદેડા ગામની સીમમાં સાબરમતી નદીના પટમાં મોટા પાયે ગેરકાયદેસર રીતે સાદી રેતીનું ખનન થઈ રહ્યું હોવાની ચોક્કસ બાતમી ખાણ ખનિજ વિભાગને મળી હતી. આ બાતમીના આધારે રોયલ્ટી ઇન્સ્પેક્ટર દિલીપ રબારી અને તેમની ટીમે દરોડો પાડ્યો હતો.તંત્રની અચાનક પડેલી ધાડથી ગેરકાયદેસર ખનન કરતા ભૂમાફિયાઓમાં ભારે નાસભાગ અને અફરાતફરી મચી ગઈ હતી.દરોડા દરમિયાન નદીના પટમાંથી ગેરકાયદેસર રીતે રેતી ઉત્ખનન માટે ઉપયોગમાં લેવાતા અંદાજિત રૂ. 1.20 કરોડની કિંમતના વાહનો ઝડપી પાડવામાં આવ્યા હતા.