મહેસાણા જિલ્લાના ખેરાલુ સ્થિત The KNSBL Arts and Commerce College ખાતે જિલ્લા પ્રભારી મંત્રી પ્રવીણભાઈ માળીના અધ્યક્ષસ્થાને 80મા સ્વાતંત્ર્ય પર્વની ભવ્ય ઉજવણી કરવામાં આવી હતી. મંત્રીએ આન, બાન અને શાન સાથે ધ્વજારોહણ કરી રાષ્ટ્રધ્વજને સલામી આપી હતી અને પરેડનું નિરીક્ષણ કર્યું હતું. ત્યારબાદ તેમણે ખુલ્લી જીપમાં સવાર થઈને ઉપસ્થિત નાગરિકોનું અભિવાદન ઝીલ્યું હતું.
સ્વાતંત્ર્ય સેનાનીઓના ત્યાગનું સ્મરણ
આ પ્રસંગે મંત્રીએ દેશવાસીઓને આઝાદી પર્વની શુભકામનાઓ પાઠવતા જણાવ્યું હતું કે, આજે તિરંગાને શાનથી લહેરાતો જોઈને આપણી છાતી ગજ ગજ ફૂલે છે. આ આઝાદી આપણને ભેટમાં નથી મળી, પરંતુ તેની પાછળ મહાત્મા ગાંધી, સરદાર પટેલ, ભગતસિંહ અને સુભાષચંદ્ર બોઝ જેવા મહાન નેતાઓ તથા અસંખ્ય નામી-અનામી સ્વાતંત્ર્ય સેનાનીઓનો ત્યાગ અને સમર્પણ રહેલા છે.
વિકાસ અને વિરાસતનો સમન્વય
મંત્રીએ જણાવ્યું કે, વડાપ્રધાન નરેન્દ્રભાઈ મોદીના 'Viksit Bharat@2047'ના સંકલ્પને સાકાર કરવા રાજ્ય સરકાર મક્કમતાથી આગળ વધી રહી છે. ગુજરાતની ડબલ એન્જિન સરકાર 'વિકાસ પણ, વિરાસત પણ'ના મંત્ર સાથે કામ કરી રહી છે. એક તરફ રાજ્યના યુવાનો ધોલેરા સેમિકન્ડક્ટર અને બુલેટ ટ્રેન જેવા મેગા પ્રોજેક્ટ્સમાં રોજગારી મેળવશે, તો બીજી તરફ પવિત્ર શ્રાવણ માસમાં નાયબ મુખ્યમંત્રી હર્ષ સંઘવીના માર્ગદર્શન હેઠળ શર્મિષ્ઠા તળાવ ખાતેથી 'વડનગર શ્રાવણોત્સવ' અને 108 કલાકારોના નાદ સાથે ભવ્ય 'ડમરુ યાત્રા'નો પ્રારંભ કરાયો હતો.
શહેરી અને ગ્રામીણ ઈન્ફ્રાસ્ટ્રક્ચરનો વિકાસ
મંત્રીએ જણાવ્યું કે, મુખ્યમંત્રી ભૂપેન્દ્રભાઈ પટેલે મહેસાણાને 'મહાનગરપાલિકા'નો દરજ્જો આપીને શહેરી વિકાસને નવી દિશા આપી છે, જેનાથી પીવાનું શુદ્ધ પાણી, અંડરગ્રાઉન્ડ ગટર અને સ્માર્ટ સિટી લેવલની સુવિધાઓ મળશે. આ ઉપરાંત પંચાયત વિભાગ દ્વારા જિલ્લામાં રૂ. 1,585 croreના ખર્ચે 2,525 કિમીના રસ્તાઓનું નિર્માણ કરવામાં આવ્યું છે.
નારી સશક્તિકરણ અને શિક્ષણ ક્ષેત્રે ક્રાંતિ
મહિલા સશક્તિકરણ અંગે વાત કરતા મંત્રીએ જણાવ્યું કે, 'મિશન મંગલમ' યોજના હેઠળ મહેસાણાના મહિલા સખી મંડળોને રૂ. 63 કરોડથી વધુની બેંક લોન આપીને આત્મનિર્ભર બનાવવામાં આવ્યા છે. શિક્ષણ ક્ષેત્રે જિલ્લાની 990 સરકારી શાળાઓમાં 1,80,000 બાળકો અભ્યાસ કરી રહ્યા છે. તેમજ 'નમો લક્ષ્મી યોજના'ના કારણે કન્યા કેળવણીમાં મોટો ઉછાળો આવ્યો છે.
આરોગ્ય સુરક્ષા અને કિસાન કલ્યાણની યોજનાઓ
મંત્રીએ જણાવ્યું કે, મહેસાણા જિલ્લામાં વડીલો અને પરિવારજનોની આરોગ્ય સુરક્ષા માટે 'આયુષ્યમાન ભારત' આશીર્વાદરૂપ સાબિત થઈ રહી છે. મહેસાણા જિલ્લામાં 12,11,000થી વધુ આયુષ્યમાન કાર્ડ ઈશ્યુ કરવામાં આવ્યા છે, જેમાં ગત વર્ષે 40,000થી વધુ ક્લેઇમ મંજૂર કરીને રૂ. 79 કરોડથી વધુની મફત સારવાર પૂરી પાડવામાં આવી છે.
ખેતી ક્ષેત્રે મહેસાણા જિલ્લો લીંબુના વાવેતરમાં રાજ્યમાં પ્રથમ અને ટામેટાના 1,48,000 મેટ્રિક ટન ઉત્પાદન સાથે મોખરે છે. 'પીએમ કિસાન સમ્માન નિધિ' હેઠળ 2,37,000થી વધુ ખેડૂતોના ખાતામાં રૂ. 475 કરોડ જમા થયા છે. હાલ જિલ્લાના 20,000થી વધુ ખેડૂતો 8,400 હેક્ટરમાં પ્રાકૃતિક ખેતી કરી રહ્યા છે અને 'દેશી ગાય નિભાવ સહાય' હેઠળ વાર્ષિક રૂ. 10,800ની સહાય મેળવી રહ્યા છે.
ગ્રીન એનર્જી અને પર્યાવરણ જતનનો સંદેશ
મહેસાણા જિલ્લામાં GSRTCની કનેક્ટિવિટી અને RTOની ઓનલાઈન ફેસલેસ સેવાઓ કાર્યરત છે. પર્યાવરણ જતન માટે 'એક પેડ મા કે નામ' અભિયાન હેઠળ ગુજરાતમાં 17 કરોડથી વધુ વૃક્ષો વાવવામાં આવ્યા છે. વિશ્વના પ્રથમ સોલાર વિલેજ મોઢેરાની જેમ મહેસાણાના 15,000થી વધુ ઘરોમાં સોલાર સિસ્ટમ કાર્યરત થતાં વીજ બિલ શૂન્ય થયા છે.
કાર્યક્રમના અંતે મંત્રીશ્રીએ રેડ ક્રોસ બ્લડ ડોનેશન કેમ્પ અને હેલ્થ ચેકઅપ કેમ્પની મુલાકાત લઈ વિદ્યાર્થીઓ સાથે સંવાદ કર્યો હતો. તેમણે વડાપ્રધાનના 'Mission LiFE' મહામંત્રને અપનાવી સિંગલ યુઝ પ્લાસ્ટિક મુક્તિ, ઉર્જા અને જળ બચત તથા દર જન્મદિવસે વૃક્ષારોપણ કરવા માટે નાગરિકોને અનુરોધ કર્યો હતો.
આ પણ વાંચો - 15 August Top News: 15 ઓગસ્ટના રોજ બનનારી મહત્વની ઘટનાઓ
