મહેસાણા જિલ્લાના ખેરાલુ નગરપાલિકાના વોર્ડ નંબર 1 ની ખાલી પડેલી 1 બેઠક માટે યોજાયેલી પેટાચૂંટણીનું મતદાન આજે શાંતિપૂર્ણ માહોલમાં પૂર્ણ થયું છે. સવારથી જ મતદાન મથકો પર સ્થાનિક મતદારોમાં ભારે ઉત્સાહ જોવા મળ્યો હતો. આ ચૂંટણીમાં ભારતીય જનતા પાર્ટી (BJP), કોંગ્રેસ (INC) અને આમ આદમી પાર્ટી (AAP) વચ્ચે કાંટાની ટક્કર અને રોચક ત્રિપાંખિયો જંગ ખેલાયો છે.
2584 મતદારોએ મતાધિકારનો ઉપયોગ કર્યો
ચૂંટણી તંત્ર દ્વારા જાહેર કરાયેલા આંકડા મુજબ, વોર્ડ નંબર 1 માં નોંધાયેલા કુલ 3,532 મતદારોમાંથી 2,584 મતદારોએ પોતાના મતાધિકારનો ઉપયોગ કર્યો હતો, જેના પગલે કુલ 73.15% જેટલું ભારે મતદાન નોંધાયું છે. જેમાં પુરુષ મતદારોના કુલ 1,794 મતોમાંથી 1,377 વોટિંગ થયું હતું, જ્યારે મહિલા મતદારોના કુલ 1,738 મતોમાંથી 1,207 મહિલાઓએ ઉત્સાહપૂર્વક મતદાન કર્યું હતું.