મહેસાણા જિલ્લાના કડી શહેરમાં લાંબા સમયના અસહ્ય ઉકળાટ અને ગરમી બાદ મેઘરાજાની ધમાકેદાર એન્ટ્રી થઈ છે. વરસાદના આગમનથી વાતાવરણમાં ઠંડક પ્રસરતા સ્થાનિક લોકોમાં ખુશીનો માહોલ જોવા મળ્યો છે. જોકે, આ ખુશીની સાથે જ કડી નગરપાલિકાની પોલ પણ સરેઆમ ખૂલી ગઈ છે. માત્ર 1 કલાક પડેલા વરસાદે પાલિકાની પ્રી-મોન્સૂન કામગીરીના લીરેલીરા ઉડાડી દીધા છે. દર વર્ષે ચોમાસા પહેલાં સફાઈ અને વ્યવસ્થાના નામે લાખો રૂપિયાનો ધુમાડો કરવામાં આવે છે, પરંતુ આ પહેલા જ વરસાદે સાબિત કરી દીધું છે કે તંત્રનો એક્શન પ્લાન માત્ર કાગળ પર જ હતો.
નીચાણવાળા વિસ્તારોમાં કેડસમા પાણી ભરાયા
માત્ર એક જ કલાકના વરસાદમાં કડીના અનેક શહેરી અને નીચાણવાળા વિસ્તારો જળબંબાકાર થઈ ગયા હતા. પરિસ્થિતિ એટલી ગંભીર બની હતી કે રસ્તાઓ પર ઠેર-ઠેર કેડસમા પાણી ભરાઈ ગયા હતા, જેના કારણે વાહનચાલકો અને સ્થાનિક રહીશો મુશ્કેલીમાં મુકાયા હતા. આ આખી સમસ્યા પાછળ નગરપાલિકા દ્વારા ગટર અને નાળાઓની યોગ્ય સફાઈ ન થઈ હોવાનું સામે આવ્યું છે. સફાઈના અભાવે પાણીના નિકાલ માટેની મુખ્ય ગટર લાઈનો ચોકઅપ થઈ ગઈ હતી, જેને લીધે વરસાદી પાણી રોડ પર અને લોકોના ઘર આંગણે ફરી વળ્યા હતા.
