મહેસાણા જિલ્લાના સાંથલ પોલીસ સ્ટેશન વિસ્તારમાં આવેલા જોટાણા ગામેથી પોલીસે ગેરકાયદેસર રીતે ચાલતા જુગારધામ પર સફળ દરોડો પાડ્યો છે. સાંથલ પોલીસની ટીમે બાતમીના આધારે કાર્યવાહી કરીને જાહેર જગ્યામાં જુગાર રમતા ઈસમોને રોકડ રકમ સહિતના મુદ્દામાલ સાથે ઝડપી પાડ્યા છે. પોલીસની આ અચાનક કાર્યવાહીથી સ્થાનિક જુગારીઓમાં ભારે અફરાતફરી અને ફફડાટ વ્યાપી ગયો હતો.
ખુલ્લી જગ્યામાં ચાલતા જુગાર પર દરોડો
સાંથલ પોલીસ સ્ટેશનના પી.આઈ. કે.કે. ચૌધરીના માર્ગદર્શન હેઠળ પી.એસ.આઈ. એમ.પી. ચૌધરી અને તેમની ટીમે ચોક્કસ બાતમીના આધારે જોટાણા બસ સ્ટેન્ડ નજીક, જોગણી માતાના મંદિર સામે આવેલી ખુલ્લી જગ્યામાં દરોડો પાડ્યો હતો. સ્થળ પરથી પોલીસે જુગાર રમતા કિસનકુમાર રાવળ, મોન્ટુભાઈ રાવળ, કનુભાઈ રાવળ અને હિંમતભાઈ ઉર્ફે મુન્નાભાઈ રાવળ નામના 4 આરોપીઓને રંગેહાથ ઝડપી લીધા હતા. દરોડા દરમિયાન પોલીસે રોકડ રકમ રૂ.99,050, ગંજીપત્તા અને પાથરણા સહિત કુલ રૂ.99050નો મુદ્દામાલ કબ્જે કર્યો છે.