વિરમગામ વિસ્તારમાં પડેલા ભારે વરસાદને કારણે વહીવટી તંત્રની પોલ ખુલી ગઈ છે. ધોધમાર વરસાદના પગલે શહેરમાં મહત્વના રસ્તાઓનું મોટા પાયે ધોવાણ થયું છે, જેના કારણે ઠેર-ઠેર ખાડા જ ખાડા જોવા મળી રહ્યા છે. તંત્રના દાવાઓ ખોટા સાબિત થયા છે અને સામાન્ય વરસાદમાં જ માર્ગોની હાલત દયનીય બની ગઈ છે.
મુખ્ય માર્ગો અને દરવાજાઓ પાસે મસમોટા ખાડાઓનું સામ્રાજ્ય
શહેરના મુખ્ય રસ્તાઓ પર પડેલા મસમોટા અને ઊંડા ખાડાઓને કારણે વાહનચાલકો અને રાહદારીઓ ત્રાસી ગયા છે. ખાસ કરીને બસસ્ટેન્ડ રોડ, અક્ષરનગર માંડલ રોડ, તેમજ ભરવાડી દરવાજા અને ગોલવાડી દરવાજા જેવા વ્યસ્ત વિસ્તારોમાં મોટા ખાડાઓ પડી ગયા છે. આ ખાડાઓમાં પાણી ભરાઈ જવાને કારણે અકસ્માત સર્જાવાની સંભાવના પણ વધી ગઈ છે.