ભરૂચ જિલ્લાના આમોદ તાલુકામાં છેલ્લા 12 કલાકથી મેઘરાજાએ મન મૂકીને વરસતાં ચારેકોર જળબંબાકારની ચિંતાજનક સ્થિતિ સર્જાઈ છે. અનરાધાર વરસાદના કારણે સ્થાનિક નદી-નાળાં અને ખાડીઓ છલકાઈ જતાં સમગ્ર વિસ્તારમાં પાણીની ભયાનક આવક થઈ છે, જેના કારણે જનજીવન અસ્તવ્યસ્ત બન્યું છે.
બુવા ગામ જળમગ્ન, સ્ટેટ હાઇવે પર કમરસમા પાણી
ભારે વરસાદી પાણીના ધસમસતા પ્રવાહમાં આમોદ તાલુકાનું બુવા ગામ ચોતરફથી ઘેરાઈ જઈને બેટમાં ફેરવાઈ ગયું છે. બુવા ગામનું પીકઅપ સ્ટેન્ડ તેમજ પ્રખ્યાત ભાથીજી મંદિર સહિતનો આખો વિસ્તાર જળમગ્ન થઈ ગયો છે. આ સાથે જ બુવા ગામ નજીકની ખાડી બે કાંઠે ઓવરફ્લો થતાં આમોદ, વાગરા અને ઔદ્યોગિક વિસ્તાર દહેજને સાંકળતા મુખ્ય સ્ટેટ હાઇવે પર કમરસમા પાણી ફરી વળ્યા છે.
