મોરબી જિલ્લા પંચાયત કચેરી ખાતે યોજાયેલી સામાન્ય સભા ભારે હંગામા અને વિવાદો વચ્ચે ચર્ચાનું કેન્દ્ર બની છે. જિલ્લા પંચાયતમાં વિકાસના કાર્યો માટે ફાળવવામાં આવેલી ગ્રાન્ટ અને તેના ઉપયોગને લઈને સદસ્યોમાં ભારે રોષ જોવા મળ્યો છે. 7 કરોડ રૂપિયાની ગ્રાન્ટ ફાળવણી સામે સભ્યોએ નારાજગી વ્યક્ત કરી છે, તો બીજી તરફ 45 લાખ રૂપિયાના ખર્ચ અંગે પંચાયતના પ્રમુખ જ અજાણ હોવાનું સામે આવતા મોરબીના રાજકારણમાં ભારે ચકચાર મચી ગઈ છે.
સામાન્ય સભામાં ગ્રાન્ટ ફાળવણી સામે ઉગ્ર વિરોધ
પ્રાપ્ત વિગતો અનુસાર, મોરબી જિલ્લા પંચાયતની સામાન્ય સભામાં સદસ્યો દ્વારા વિવિધ વિકાસ કાર્યો માટે ફાળવવામાં આવેલી 7 કરોડ રૂપિયાની ગ્રાન્ટ ની ફાળવણી અને તેના પારદર્શક ઉપયોગ સામે સવાલો ઉઠાવવામાં આવ્યા હતા. સભા દરમિયાન ભાજપ અને કોંગ્રેસ બંને પક્ષના સભ્યોએ ગ્રાન્ટના મુદ્દે પોતાની નારાજગી વ્યક્ત કરી હતી અને વહીવટી કામગીરી સામે અસંતોષ દાખવ્યો હતો.
45 લાખના ખર્ચ અંગે પ્રમુખને નહોતી કોઈ જાણકારી
વિવાદનું મુખ્ય કેન્દ્ર 45 લાખ રૂપિયાનો વહીવટી ખર્ચ બન્યો હતો. જિલ્લા પંચાયત દ્વારા કરવામાં આવેલા 45 લાખ રૂપિયાના ખર્ચ બાબતે જ્યારે સવાલો પૂછવામાં આવ્યા, ત્યારે ખુદ જિલ્લા પંચાયત પ્રમુખ ગીતાબેન ડુબરીયા ને જ આ ખર્ચ ક્યાં અને કેવી રીતે થયો છે તેની કોઈ સત્તાવાર જાણ ન હોવાનું સામે આવ્યું હતું. પ્રમુખને જ પોતાના જ નાણાકીય ખર્ચની પૂરતી વિગતો ન હોવાને કારણે તેઓ વિરોધી સભ્યોના નિશાના પર આવી ગયા હતા અને ભારે ઘેરાયા હતા.
રાજકીય સમીકરણો અને બહુમતીનો પક્ષ
ઉલ્લેખનીય છે કે, મોરબી જિલ્લા પંચાયત કચેરીમાં આંકડાકીય દ્રષ્ટિએ 17 ભાજપના અને 7 કોંગ્રેસના સદસ્યો હોવા છતાં, રોટેશન અનામત બેઠકનાં સમીકરણોના પગલે પ્રમુખપદ કોંગ્રેસના ફાળે આવ્યું હતું. ભાજપની સ્પષ્ટ બહુમતી હોવા છતાં અનામત બેઠકના કારણે કોંગ્રેસના સભ્ય પ્રમુખ બન્યા હોવાથી આંતરિક રાજકીય ખટપટ અને સંકલનના અભાવ વચ્ચે ગ્રાન્ટનો આ વિવાદ આગામી દિવસોમાં વધુ વકરે તેવી પૂરી સંભાવના છે.
ગુજરાતના વધુ સમાચાર વાંચવા માટે ક્લિક કરો
