મોરબી નજીક આવેલા જેતપર ખાતે સત્યાગ્રહ છાવણી શરૂ થયાને પાંચ મહિના જેટલો સમય વીતી ચૂક્યો છે.ખેડૂતો પોતાના પડતર પ્રશ્નો અને ખાસ કરીને વીજપોલની લડતને લઈને અડગ રહીને આ સત્યાગ્રહ ચલાવી રહ્યા છે.આ સમયગાળા દરમિયાન ખેડૂતો અને સરકાર વચ્ચે 24 મુદ્દાઓ પર મહત્વપૂર્ણ બેઠક પણ યોજાઈ ચૂકી છે. આ 24 મુદ્દાની બેઠક યોજાયા છતાં ખેડૂતોની મુખ્ય માંગણીઓ અંગે કોઈ સંતોષકારક નિર્ણય ન આવતાં ખેડૂતોમાં ભારે અસંતોષ છે.તેમ છતાં ખેડૂતોએ સ્પષ્ટ કર્યું છે કે તેઓ આંદોલન સંપૂર્ણપણે શાંતિપૂર્ણ પદ્ધતિથી ચાલુ રાખશે.
ખેડૂતોએ પોતાનો અવાજ વધુ બુલંદ બનાવવાનો નિર્ધાર કર્યો
ખેડૂત અગ્રણીઓએ જેતપર સત્યાગ્રહ છાવણી ખાતેથી એકસૂરે હુંકાર કર્યો છે કે જ્યાં સુધી માંગણીઓ સ્વીકારવામાં નહીં આવે ત્યાં સુધી આ લડત નબળી પડશે નહીં. સરકાર સાથે બેઠક બાદ ખેડૂતોએ પોતાનો અવાજ વધુ બુલંદ બનાવવાનો નિર્ધાર કર્યો છે. આ સત્યાગ્રહમાં જોડાયેલા તમામ ખેડૂતો એકતા દર્શાવીને કોઈપણ ભોગે ન્યાય મેળવવા માટે મક્કમ છે.ખેડૂતોએ જણાવ્યું છે કે જો સરકાર દ્વારા યોગ્ય પગલાં ભરીને માગણીઓ સંતોષવામાં નહીં આવે તો દિવાળી બાદ વિશાળ કિસાન મહાપંચાયત સભા યોજવામાં આવશે.વીજપોલ સંદર્ભે ચાલી રહેલી આ લડતને સમગ્ર ગુજરાતના 56 લાખ ખેડૂત પરિવારોનું પ્રત્યક્ષ કે પરોક્ષ રીતે સમર્થન પ્રાપ્ત થયેલું છે.આ આંદોલનને વધુ વ્યાપક અને અસરકારક બનાવવા માટે આગામી સમયમાં ગુજરાતના 56 લાખ ખેડૂત પરિવારોમાંથી એક-એક ખેડૂતને સાથે રાખીને એકત્ર કરવામાં આવશે.
અભૂતપૂર્વ શક્તિપ્રદર્શન યોજવામાં આવશે
ખેડૂત પ્રતિનિધિઓએ સ્પષ્ટ જણાવ્યું કે દરેક પરિવારમાંથી ખેડૂતોને સાથે રાખીને અભૂતપૂર્વ શક્તિપ્રદર્શન યોજવામાં આવશે.આ મહાસભા દ્વારા ખેડૂત એકતાની તાકાત દર્શાવવામાં આવશે જેથી શાસન સુધી ખેડૂતોની વેદના પહોંચી શકે. આ પ્રશ્ન સમગ્ર રાજ્યના ખેડૂત પરિવારોના હિત સાથે જોડાયેલો હોવાથી રાજ્યવ્યાપી સ્તરે આ શક્તિપ્રદર્શન યોજાશે.આ વિશાળ એકત્રિકરણ થકી ખેડૂતો પોતાની એકતાનું શક્તિશાળી પ્રદર્શન કરી તંત્ર પર દબાણ લાવશે. આગામી 22 તારીખે કોંગ્રેસ દ્વારા આયોજિત ખેડૂત મહાપંચાયતના કાર્યક્રમ અંગે જેતપર સત્યાગ્રહ છાવણીએ સંપૂર્ણ મૌન સેવ્યું છે.આ મુદ્દે સત્યાગ્રહ છાવણીના ખેડૂતોએ કોઈ રાજકીય વલણ દાખવ્યું નથી કે કોઈ નિવેદન આપ્યું નથી.
આંદોલન અવિરતપણે આગળ ધપાવવામાં આવશે
સત્યાગ્રહ છાવણીમાં ઉપવાસ પર બેઠેલા ખેડૂત આગેવાનોએ સ્પષ્ટ કર્યું છે કે તેમની આ ઉપવાસ છાવણી તદ્દન બિનરાજકીય છે અને કોઈપણ પક્ષ સાથે તેને કોઈ લેવાદેવા નથી. ખેડૂતો માત્ર ધરતીપુત્રોના અધિકાર અને વીજપોલની સમસ્યાના કાયમી ઉકેલ માટે શાંતિથી લડી રહ્યા છે. રાજકીય પક્ષોના આયોજનોથી અલિપ્ત રહીને ખેડૂતો પોતાના દમ પર દિવાળી પછી ખેડૂત મહાપંચાયત સભા બોલાવશે. જ્યાં સુધી સરકાર સાથેની વાટાઘાટોનું યોગ્ય પરિણામ નહીં આવે ત્યાં સુધી આ શાંતિપૂર્ણ આંદોલન અવિરતપણે આગળ ધપાવવામાં આવશે.
આ પણ વાંચોઃ India News : તહેવારોને કારણે આંદોલન મોકૂફ રહેતાં રાહુલ વિયેતનામ રવાના, ભાજપે નવરાત્રિમાં વિદેશ પ્રવાસ સામે પ્રહારો કર્યા
