મોરબી જિલ્લાના હળવદ તાલુકામાં એક અત્યંત કરુણ અને આઘાતજનક ઘટના સામે આવી છે. માથક ગામની સીમમાં આવેલી માધવ ગોકળભાઈની વાડીમાં ખેતમજૂરી કરતાં શ્રમિક પરિવાર પર અચાનક આકાશી આફત ત્રાટકી હતી. સાંજના સમયે કડાકા-ભડાકા સાથે શરૂ થયેલા વરસાદી ઝાપટાં દરમિયાન ખેતરમાં મગફળીના પાકને પિયત કરી રહેલા માતા અને માસૂમ પુત્ર પર અચાનક વીજળી પડી હતી. વીજળીના જોરદાર આંચકાને કારણે બંનેનું સ્થળ પર જ કમકમાટીભર્યું મોત નીપજ્યું હતું.
મૃતકોની ઓળખ અને સારોદ ગામના પરિવારમાં અરેરાટી
આ કરુણ દુર્ઘટનામાં માધવભાઈની વાડીમાં મજૂરી કામ કરતા 28 વર્ષીય મનકુબેન રાકેશભાઈ નાયકા અને તેમના 4 વર્ષના માસૂમ પુત્ર શ્યામ રાકેશભાઈ નાયકાનું અકાળે અવસાન થયું છે. એકસાથે માતા અને બાળકના આકસ્મિક અવસાનથી શ્રમિક પરિવાર પર દુઃખનો પહાડ તૂટી પડ્યો છે. બનાવને પગલે માથક ગામ અને આસપાસના ખેતમજૂર આલમમાં ભારે અરેરાટી અને શોકનું મોજું ફરી વળ્યું છે.