નર્મદા જિલ્લામાંથી આદિવાસી સમાજના જંગલ જમીનના અધિકારોને લઈને એક અત્યંત મહત્વપૂર્ણ અને ચિંતાજનક સમાચાર સામે આવ્યા છે. ખોપી સ્થિત લીલાવન સત્યાગ્રહ છાવણી ખાતે દિવાળી સ્નેહમિલન સાથે આદિવાસી સમાજના જંગલ-જમીનના પડતર પ્રશ્નો અંગે એક વિશેષ અને મહત્વપૂર્ણ બેઠકનું આયોજન કરવામાં આવ્યું હતું. લાંબા સમયથી પ્રશ્નો ન ઉકેલાતા આદિવાસી આગેવાનો અને સ્થાનિકોમાં સરકાર સામે ભારે રોષ અને આક્રોશ જોવા મળી રહ્યો છે.
15 નવેમ્બર સુધીમાં પ્રશ્નો ઉકેલવાની માગ
આ બેઠક દરમિયાન આગેવાનોએ જણાવ્યું હતું કે, એક તરફ જનજાતીય ગૌરવ દિવસની ઉજવણી કરવામાં આવે છે, તો બીજી તરફ આદિવાસીઓને પોતાના જ જળ, જંગલ અને જમીનના અધિકારો માટે સંઘર્ષ કરવો પડી રહ્યો છે. ભગવાન બિરસા મુંડાને સાચી શ્રદ્ધાંજલિ ત્યારે જ મળી કહેવાય જ્યારે આદિવાસીઓને તેમના કાયદેસરના હકો મળે. આ બેઠકમાં લીલાબેન વસાવા દ્વારા ૧૫ નવેમ્બર સુધીમાં જંગલ જમીનના પડતર પ્રશ્નો ઉકેલવા માટે સ્પષ્ટ અલ્ટીમેટમ આપવામાં આવ્યું છે. જો નિર્ધારિત સમયમાં પ્રશ્નોનું નિરાકરણ નહીં આવે તો આત્મવિલોપન જેવું ગંભીર પગલું ભરવાની ચીમકી પણ ઉચ્ચારવામાં આવી છે, જેને લઈને વહીવટી તંત્રમાં દોડધામ મચી ગઈ છે.