નવસારી જિલ્લામાં આભ ફાટવા જેવી સ્થિતિ વચ્ચે સર્જાયેલા જળબંબાકારની સ્થિતિમાં એક અત્યંત રોમાંચક અને જીવ અધ્ધર કરી દેનારી ઘટના સામે આવી છે. અહીંથી પસાર થતા નેશનલ હાઈવે પર આવેલા ખારેલ ગામ નજીક પૂરના કારણે રસ્તા પર નદી જેવા ધસમસતા પાણી વહી રહ્યા હતા. આ જોખમી અને તીવ્ર પ્રવાહની વચ્ચેથી પસાર થવાનો પ્રયાસ કરી રહેલી એક કાર અચાનક પાણીના ભારે વેગમાં બેકાબૂ થઈને બારોબાર તણાવા લાગી હતી.
કારમાં સવાર ત્રણ મુસાફરો માટે ફાયર ફાઈટરો બન્યા દેવદૂત
કાર જોતજોતામાં ઊંડા પાણીમાં તણાવા લાગતાં તેની અંદર સવાર ત્રણ મુસાફરોના જીવ તાળવે ચોંટી ગયા હતા અને તેમના માટે મોટું આકાશી જોખમ સર્જાયું હતું. આ કટોકટીની પળોમાં ઘટનાની જાણ થતાં જ ગણદેવી નગરપાલિકાના ફાયર ફાઇટરની ટીમ પૂરના પાણીની વચ્ચે લોકેશન પર પહોંચી ગઈ હતી. ફાયર વિભાગના જાંબાઝ જવાનોએ પૂરમાં તણાઈ રહેલી કારને મજબૂત દોરડાઓ અને આધુનિક સાધનોની મદદથી તણાતી અટકાવીને ભારે જહેમત બાદ સફળતાપૂર્વક સ્થિર કરી દીધી હતી.