નવસારી વિજલપોર મહાનગરપાલિકા દ્વારા આયોજિત ફ્લાવર શો અને તાયફાઓ પાછળ પ્રજાના ટેક્સના નાણાંનો બેફામ ધુમાડો કરવામાં આવ્યો હોવાનો સનસનાટીભર્યો ખુલાસો થયો છે. એક જાગૃત નાગરિક દ્વારા કરવામાં આવેલી આરટીઆઈ (RTI) માં મનપાની ફિઝૂલખર્ચ અને વહીવટી બેદરકારી છતી થઈ છે. ફ્લાવર શો માટે મંજૂર કરાયેલા રૂ.2.45 કરોડના અંદાજિત બજેટના બદલે મનપા શાસકો અને અધિકારીઓએ રૂ.3 કરોડથી પણ વધુની રકમ રણગણાવી દીધી હોવાની વિગતો સામે આવતાં સ્થાનિક રહીશોમાં ભારે આક્રોશ વ્યાપી ગયો છે.
ગિનીઝ વર્લ્ડ રેકોર્ડમાં સ્થાન મેળવવા ચૂકવી લાખોની ફી
RTI ની વિગતો મુજબ માત્ર વાહવાહ અને પબ્લિસિટી મેળવવા માટે મનપાએ ગિનીઝ વર્લ્ડ રેકોર્ડમાં નામ દર્જ કરાવવાનો મોહ રાખ્યો હતો. આ રેકોર્ડ મેળવવા માટે નવસારી મનપાએ વિદેશી ચલણ ખરીદીને રૂ.32 લાખ જેટલી માતબર રકમ માત્ર ફી સ્વરૂપે ગિનીઝ બુકના આયોજકોને ચૂકવી દીધી હતી. નાના એવા નવસારી શહેરમાં જ્યાં પ્રજા પાયાની સુવિધાઓ માટે ઝંખી રહી છે, ત્યાં આ પ્રકારે કરોડો રૂપિયાના તાયફા કરવામાં આવતાં નવસારી મનપાની કામગીરી સામે ગંભીર સવાલો ઊભા થયા છે.