સુરત જિલ્લાના ઓલપાડ તાલુકામાં આવેલા સાયણ વિસ્તારમાં વોટરજેટ ટેક્સટાઈલ એકમોમાં કામ કરતા કામદારોએ અચાનક હડતાળ પાડીને વિરોધ પ્રદર્શન શરૂ કર્યું હતું. રવિવારની સાપ્તાહિક રજા આપવા તેમજ અન્ય પડતર માગણીઓને લઈને મોટી સંખ્યામાં કામદારો રસ્તા પર ઉતરી આવ્યા હતા. વિરોધ કરનારાઓમાં ઉત્તર પ્રદેશ અને બિહારથી આવેલા પરપ્રાંતીય શ્રમિકોની સંખ્યા ખૂબ જ મોટી હતી, જેના કારણે વિસ્તારમાં ભારે ચકચાર મચી ગઈ હતી.
પોલીસે સ્થળ પર પહોંચી ટોળાને વિખેર્યું
કામદારો દ્વારા વિરોધ પ્રદર્શન ઉગ્ર બનાવીને અન્ય કંપનીઓ અને કારખાનાઓ પણ બંધ કરાવવાનો પ્રયાસ કરવામાં આવ્યો હતો. આ અંગેની જાણ થતાં જ ઓલપાડ પોલીસ મથકનો કાફલો તાત્કાલિક ઘટનાસ્થળે દોડી આવ્યો હતો. પરિસ્થિતિ વણસે તે પહેલાં પોલીસે સમયસૂચકતા વાપરીને ગેરકાયદેસર રીતે એકઠા થયેલા અને કંપનીઓ બંધ કરાવવા જતાં કામદારોના ટોળાને વિખેરી નાખ્યું હતું.
