ગુજરાત સરકારના નશામુક્ત ગુજરાતના સંકલ્પને સાકાર કરવા માટે પાટણ જિલ્લા પોલીસ પ્રશંસનીય રીતે એક્શન મોડમાં જોવા મળી રહી છે. પાટણ સ્પેશિયલ ઓપરેશન ગ્રુપ (SOG) અને રાધનપુર પોલીસની સંયુક્ત ટીમે એક ગુપ્ત ઓપરેશન હાથ ધરીને રાધનપુર પોલીસ સ્ટેશન વિસ્તારમાંથી લાખો રૂપિયાની કિંમતનો નશીલા પદાર્થનો જથ્થો ઝડપી પાડવામાં મોટી સફળતા મેળવી છે. પોલીસ ટીમે ઘટનાસ્થળેથી કાયદેસરની રેડ દરમિયાન કુલ 9.690 કિલોગ્રામ જેટલો પ્રતિબંધિત સૂકો ગાંજો ઝડપી પાડી નશાના વેપારીઓમાં ભારે ફફડાટ મચાવી દીધો છે.
દાંતાથી રાધનપુર મંગાવાયેલો કાળો કારોબાર
આ હાઈપ્રોફાઈલ દરોડા દરમિયાન પોલીસે નશીલા પદાર્થના આ જથ્થા સહિત કુલ રૂપિયા 4,84,500 નો મસમોટો મુદ્દામાલ કાયદેસર રીતે પોતાના કબજે કર્યો છે. પોલીસની પ્રાથમિક પૂછપરછમાં નશાના આ કાળા કારોબારનું બનાસકાંઠા કનેક્શન બહાર આવ્યું છે. આ માદક પદાર્થનો જથ્થો બનાસકાંઠાના દાંતાથી ખાસ ઓર્ડર આપીને રાધનપુર મંગાવવામાં આવ્યો હોવાનું ખુલ્યું છે. પોલીસે આ ગુનાહિત નેટવર્ક સાથે સંકળાયેલા મુખ્ય સૂત્રધાર આરોપી આનંદ ઠાકોર અને કોદરવી લાધાભાઇ નામના બે ઈસમોને ઝડપીને કાયદાના સકંજામાં લીધા છે.