પાટણ જિલ્લાના સમી તાલુકામાં આવેલ કનીજ ગામે મોટા પાયે જુગારધામ ચાલી રહ્યું હોવાની ગુપ્ત બાતમી ગાંધીનગર સ્ટેટ મોનિટરિંગ સેલ (SMC) ની ટીમને મળી હતી. સ્થાનિક સમી પોલીસની મીઠી નજર હેઠળ અને નિષ્ક્રિયતા વચ્ચે આ જુગારનો અડ્ડો ધમધમી રહ્યો હોવાની આશંકા સાથે SMC ની ટીમે બાતમી વાળા સ્થળે અચાનક આકસ્મિક દરોડો પાડ્યો હતો.
સમીના કનીજમાં SMC ના દરોડા
SMC ની આ ત્રાટક કાર્યવાહીથી જુગાર રમી રહેલા ઈસમોમાં ભારે નાસભાગ અને અફરાતફરી મચી ગઈ હતી. પોલીસે સ્થળ પરથી જુગાર રમી રહેલા 8 જુગારીઓને રંગેહાથ ઝડપી પાડ્યા હતા, જ્યારે એક ઈસમ અંધારા કે ભીડનો લાભ ઉઠાવીને નાસી છૂટવામાં સફળ રહ્યો હતો.દરોડા દરમિયાન પોલીસે સ્થળ પરથી દાવ પર લગાવેલી તેમજ અંગજડતીમાંથી મળીને કુલ રૂ. 4,97,700 ની રોકડ રકમ કબ્જે કરી હતી. આ ઉપરાંત જુગારીઓ પાસે રહેલા રૂ. 1,40,850 ની કિંમતના 9 નંગ મોબાઈલ ફોન પણ જપ્ત કરવામાં આવ્યા હતા. આમ, SMC એ સ્થળ પરથી કુલ રૂ. 6,38,550 નો મુદ્દામાલ જપ્ત કર્યો હતો.