પેટલાદ શહેરમાં આગામી ગુરુવારના રોજ પરંપરાગત રૂટ પર ભગવાન જગન્નાથ, ભાઈ બલભદ્ર અને બહેન સુભદ્રાજીની રથયાત્રા નીકળનાર છે. આ ધાર્મિક મહોત્સવમાં હજારોની સંખ્યામાં શ્રદ્ધાળુઓ ઉમટી પડતા હોવાથી અને રથયાત્રા શહેરના મિશ્ર વસ્તી ધરાવતા વિસ્તારોમાંથી પસાર થતી હોવાથી સુરક્ષા વ્યવસ્થાને ચુસ્ત બનાવવી અનિવાર્ય છે. આ બાબતને ગંભીરતાથી લઈને આણંદ જિલ્લા પોલીસ વડાની સૂચના અનુસાર પેટલાદ શહેર પોલીસ સ્ટેશન દ્વારા રથયાત્રાના સમગ્ર રૂટ પર કાયદો અને વ્યવસ્થાની સ્થિતિની સમીક્ષા કરવા અને સ્થાનિક નાગરિકો સાથે સંવાદ સાધવા માટે વિશેષ 'ફૂટ પેટ્રોલિંગ' (પગપાળા માર્ચ) નું આયોજન કરવામાં આવ્યું હતું.
સંવેદનશીલ વિસ્તારો પર વિશેષ વોચ
શહેર પોલીસ ઇન્સ્પેક્ટર (PI) વી. પી. ચૌહાણની સીધી આગેવાની હેઠળ પોલીસ સબ ઇન્સ્પેક્ટર અને મોટી સંખ્યામાં સશસ્ત્ર પોલીસ જવાનો તેમજ હોમગાર્ડ્સ અને જીઆરડીના જવાનો આ ફૂટ પેટ્રોલિંગમાં જોડાયા હતા. પોલીસના કાફલાએ રથયાત્રાના મુખ્ય અને સંવેદનશીલ ગણાતા વિસ્તારો જેવા કે પઠાણવાડા, નાગરકુવા, ચાવડી બજાર અને સરદાર ચોક સહિતના તમામ ગલી-મહોલ્લાઓમાં પગપાળા ભ્રમણ કર્યું હતું. આ પેટ્રોલિંગનો મુખ્ય હેતુ રથયાત્રાના રૂટ પર આવતા ઉંચા મકાનો, ધાબા પોઇન્ટ અને સાંકડી ગલીઓનું ભૌગોલિક નિરીક્ષણ કરવાનો હતો, જેથી ઇમરજન્સી સમયે પોલીસ ફોર્સ ત્વરિત એક્શન લઈ શકે.