આણંદ જિલ્લાના પેટલાદ પંથકમાં સાંજના સમયે વાતાવરણમાં એકાએક પલટો આવ્યો હતો. કાળાડિબાંગ વાદળોની ઘેરાબંધી વચ્ચે ભારે ગાજવીજ અને કડાકા-ભડાકા સાથે ધોધમાર વરસાદ તૂટી પડ્યો હતો. અચાનક શરૂ થયેલા આ મુસળધાર વરસાદને કારણે સમગ્ર પંથકમાં ઠંડક પ્રસરી ગઈ હતી, પરંતુ ટૂંકા સમયમાં પડેલા ભારે વરસાદને પગલે જનજીવન પર તેની સીધી અસર જોવા મળી હતી.
નીચાણવાળા વિસ્તારો અને મુખ્ય માર્ગો પર પાણી ભરાયા
ધોધમાર વરસાદના કારણે પેટલાદ શહેરના નીચાણવાળા વિસ્તારો જળબંબાકાર બની ગયા હતા. ખાસ કરીને બસ સ્ટેન્ડથી કાલકા ગેટ તરફ જવાના મુખ્ય માર્ગ ઉપર તેમજ ઇસરામાં રોડ સહિત વિવિધ વિસ્તારોમાં માર્ગો પર વરસાદી પાણી ફરી વળ્યા હતા. રસ્તાઓ પર પાણી ભરાઈ જવાને કારણે વાહનચાલકો અને રાહદારીઓને પસાર થવામાં ભારે મુશ્કેલીનો સામનો કરવો પડ્યો હતો.
