પોરબંદર શહેરમાંથી કાયદો અને વ્યવસ્થાની રક્ષા કરતા પોલીસ બેડાને ચોંકાવી દેતી એક દુઃખદ ઘટના સામે આવી છે. અહીં રહેતી એક મહિલા પોલીસ કોન્સ્ટેબલે અગમ્ય કારણોસર આત્મહત્યા કરવાનો પ્રયાસ કર્યો હોવાના અહેવાલ મળ્યા છે. પ્રાપ્ત વિગતો અનુસાર, પોરબંદરના નરસંગ ટેકરી આશાપુરા વિસ્તારમાં રહેતી 38 વર્ષીય મહિલા કોન્સ્ટેબલ નિલમબેન રમણીકલાલ પ્રજાપતિએ પોતાના ઘરે કોઈ કારણોસર ઉંદર મારવાની ઝેરી દવા ગટગટાવી લીધી હતી. આ ઘટનાની જાણ થતાં જ પોલીસ વિભાગ અને સ્થાનિક પંથકમાં ભારે ચકચાર મચી ગઈ છે.
સારવાર અર્થે સરકારી ભાવસિંહજી હોસ્પિટલમાં ખસેડાયા
ઝેરી દવા પી લીધા બાદ મહિલા કોન્સ્ટેબલની તબિયત અચાનક લથડવા લાગી હતી. આ બાબતની પરિવારજનોને જાણ થતાં જ તેઓમાં ભારે નાસભાગ મચી ગઈ હતી. ગંભીર સ્થિતિ સર્જાય તે પહેલાં પરિવારના સભ્યો અને નજીકના લોકો દ્વારા નિલમબેનને તાત્કાલિક અસરથી સારવાર માટે પોરબંદરની સરકારી ભાવસિંહજી હોસ્પિટલ ખાતે ખસેડવામાં આવ્યા હતા. હાલ હોસ્પિટલના તબીબો દ્વારા તેમની સઘન સારવાર શરૂ કરી દેવામાં આવી છે.
