પાટણ જિલ્લાના રાધનપુર વિસ્તારમાં અસામાજિક તત્વો અને ખનન માફિયાઓનો ત્રાસ દિન-પ્રતિદિન વધી રહ્યો હોય તેમ કાયદો અને વ્યવસ્થાની સ્થિતિ વણસી રહી છે. રાધનપુરમાં મોડી રાત્રે અસામાજિક તત્વોએ એક યુવકને નિશાન બનાવીને તેના પર તીક્ષ્ણ હથિયારો વડે જીવલેણ હુમલો કર્યો હતો. નજીવી બાબતે થયેલી તકરારમાં યુવકની હત્યા કરી નાખવાના સ્પષ્ટ ઈરાદાથી આ હુમલો કરવામાં આવ્યો હોવાનું સામે આવ્યું છે. આ સનસનાટીભરી ઘટનાને પગલે સમગ્ર પંથકમાં ભારે અરેરાટી અને રોષનો માહોલ ફેલાઈ ગયો છે.
હુમલામાં યુવક ગંભીર રીતે ઈજાગ્રસ્ત
સાતુન ગામના રહેવાસી દિનેશ ઠાકોર નામના યુવક પર અસામાજિક તત્વોના ટોળાએ અચાનક તૂટી પડીને માથાના ભાગે તથા શરીર પર તીક્ષ્ણ હથિયારોના આડેધડ ઘા ઝીંકી દીધા હતા. આ ઘાતકી હુમલામાં દિનેશ ઠાકોરને માથાના ભાગે ગંભીર ઈજાઓ પહોંચતાં 10થી વધુ ટાંકા આવ્યા છે, જ્યારે તેમના બંને પગમાં ગંભીર ફેક્ચર થયું હોવાની વિગતો પ્રાપ્ત થઈ છે. ઘટના બાદ લોહીલુહાણ હાલતમાં ઘવાયેલા યુવકને તાત્કાલિક સારવાર અર્થે પાટણની ધારપુર સિવિલ હોસ્પિટલ ખાતે ખસેડવામાં આવ્યો છે, જ્યાં તેની હાલત ગંભીર બતાવાઈ રહી છે.