અરવલ્લી જિલ્લાના શામળાજી પંથકમાંથી હાઈવે પર મુસાફરી કરતા વાહનચાલકોની આંખ ઉઘાડતો એક અત્યંત ચોંકાવનારો અકસ્માત સામે આવ્યો છે. શામળાજી નજીક આવેલા લાલપુર ગામ પાસે હાઈવે પરથી પસાર થઈ રહેલી એક કાર સાથે અચાનક જ ગંભીર યાંત્રિક ખામી સર્જાઈ હતી. ચાલુ કારે અચાનક જ તેનું એક વ્હીલ (પૈડું) ધડાકાભેર બહાર નીકળી ગયું હતું, જેને કારણે હાઈવે પર પૂરઝડપે દોડતી કાર રોડ પર જ ગોથા ખાઈને પલટી મારી ગઈ હતી.
ઉદયપુરથી ખેડા જઈ રહેલો પરિવાર નડ્યો અકસ્માત
કારમાં સવાર મુસાફરો રાજસ્થાનના ઉદયપુરથી ગુજરાતના ખેડા તરફ જઈ રહ્યા હતા, તે દરમિયાન શામળાજીના લાલપુર પાસે કાળે ઓચિંતો ઘેરો ઘાલ્યો હતો. ચાલુ ગાડીએ ટાયર આખું બહાર નીકળી જતાં ચાલકે સ્ટીયરિંગ પરનો કાબૂ સંપૂર્ણપણે ગુમાવી દીધો હતો અને કાર રોડની સાઈડમાં પલટી ગઈ હતી. આ ભયાનક દુર્ઘટનામાં કારના ચાલક (ડ્રાઈવર) સહિત તેમાં સવાર અન્ય એક વ્યક્તિને શરીરે અત્યંત ગંભીર અને નાની-મોટી જીવલેણ ઈજાઓ પહોંચી હતી.