સુરેન્દ્રનગર એસ.ઓ.જી. (SOG) ટીમે મેડિકલ ક્ષેત્રે ગેરકાયદેસર પ્રવૃત્તિઓ આચરતા તત્વો સામે કડક કાર્યવાહી હાથ ધરી છે. આ ઝુંબેશ અંતર્ગત છતરીયાળા ગામે કોઈપણ અધિકૃત મેડિકલ ડિગ્રી વિના જ ક્લિનિક ખોલીને બોગસ ડોક્ટર બની દવાનો વેપલો ચલાવતા હિતેશભાઈ પ્રેમજીભાઈ કિહલા નામના શખ્સને ઝડપી પાડવામાં આવ્યો છે. આ શખ્સ ગામના નિર્દોષ દર્દીઓના આરોગ્ય અને જીવ સાથે ગંભીર ખિલવાડ કરી રહ્યો હતો.
એલોપેથી દવાઓ સહિત રૂ.15,612નો મુદ્દામાલ જપ્ત
એસ.ઓ.જી.ની ટીમે બાતમીના આધારે દરોડો પાડીને આરોપીની અટકાયત કરી હતી. ક્લિનિકની તલાશી લેતા સ્થળ પરથી અલગ-અલગ જાણીતી કંપનીઓની એલોપેથી દવાઓ, એલોપેથિક ઇન્જેક્શન્સ અને તબીબી સાધનોનો મોટો જથ્થો મળી આવ્યો હતો. પોલીસે રૂ.15,612ની કિંમતનો તમામ એલોપેથી દવાનો જથ્થો અને સાધનો કબ્જે કરીને કાયદેસરની જપ્તી હાથ ધરી છે.