સુરેન્દ્રનગર જિલ્લાના લખતરમાંથી માનવતા અને સમયસૂચકતાનો એક મોટો કિસ્સો સામે આવ્યો છે. અહીં એક મહિલાએ પારિવારિક અણબનાવથી કંટાળીને નર્મદા કેનાલમાં કૂદી આપઘાત કરવાનો પ્રયાસ કર્યો હતો. જો કે, ખેતરમાંથી મજૂરી કામ કરીને પરત ફરી રહેલા શ્રમિકોની નજર પડતાં તેમણે પોતાની જાનની પરવા કર્યા વિના કેનાલમાં કૂદીને મહિલાને સહીસલામત બહાર કાઢી નવું જીવન આપ્યું હતું.
કૌટુંબિક કલેશથી કંટાળીને ઉઠાવ્યું અંતિમ પગલું
લખતર શહેરની એક મહિલા ઘરકંકાસ અને કૌટુંબિક ઝઘડાઓથી માનસિક રીતે ખૂબ જ પરેશાન હતી. સતત વધતા માનસિક તણાવના કારણે આખરે તેણે મોતને વહાલું કરવાનો નિર્ણય કર્યો હતો. મહિલા લખતર નજીકથી પસાર થતી નર્મદા કેનાલ પર પહોંચી હતી અને કોઈ કંઈ સમજે તે પહેલાં જ તેણે કેનાલના ઊંડા પાણીમાં ઝંપલાવી દીધું હતું. સદનસીબે તે જ સમયે ખેત મજૂરીનું કામ પતાવીને કેટલાક શ્રમિકો ટ્રેક્ટરમાં બેસીને ત્યાંથી પસાર થઈ રહ્યા હતા.