તાપીના સોનગઢમાં જમીન વિવાદ અને કેટલાક શખ્સોના સતત ત્રાસથી કંટાળીને એક હિન્દુ યુવકે પોતાની જીવનલીલા ટૂંકાવી લીધી છે. યુવકના પરિવારજનો દ્વારા ગંભીર આક્ષેપો કરવામાં આવ્યા છે કે અગાઉ ઘરની જમીન મુદ્દે આસપાસના લોકો દ્વારા તેમને ભારે હેરાનગતિ કરવામાં આવતી હતી. આ મામલે યુવકે વારંવાર સ્થાનિક પોલીસ સ્ટેશન તેમજ રાજ્યના ગૃહમંત્રી હર્ષ સંઘવીની ઓફિસે સુધી જઈને ન્યાય માટે ધક્કા ખાધા હતા, પરંતુ કોઈ સંતોષકારક કાર્યવાહી ન થવાથી નાસીપાસ થઈને યુવકે આત્મહત્યાનું પગલું ભરી લીધું હતું.
મૃતકનો વિધર્મી શખ્સો સામે આક્ષેપો કરતો ઓડિયો વાયરલ
આત્મહત્યાની આ ઘટના બાદ મૃતક યુવકનો એક ઓડિયો સોશિયલ મીડિયા પર જોરશોરથી વાયરલ થયો હતો, જેમાં તેણે સોનગઢ નગરના કેટલાક વિધર્મી શખ્સો દ્વારા આપવામાં આવતા ત્રાસ અને પરેશાની વિશે ખુલાસા કર્યા હતા. આ વાયરલ ઓડિયો અને પરિવારના આક્ષેપોને આધારે પોલીસ તંત્ર હરકતમાં આવ્યું છે. સોનગઢ પોલીસે આ પ્રકરણને ગંભીરતાથી લઈને સલીમ મુલ્લા (સોનગઢ ભાજપના પૂર્વ કોર્પોરેટર), વસીમ ઉર્ફે દાદુ, રિયાઝ શેખ, ઇમ્તિયાઝ શેખ અને બિપિન રતન ગામીત સહિત ૫ થી વધુ આરોપીઓ વિરુદ્ધ ગુનો નોંધીને કાયદેસરની તપાસના ચક્રો ગતિમાન કર્યા છે.