વલસાડ જિલ્લાના પારડી તાલુકામાં આવેલા સોંઢલવાડા ગામે એક અત્યંત ચોંકાવનારી ઘટના સામે આવી છે. વગર નંબરની કાર લઈને નીકળેલા અમુક શખ્સોએ પોતાની ઓળખ ‘પોલીસ’ તરીકે આપીને એક યુવકને અટકાવ્યો હતો. “તમે દારૂનો ધંધો કરો છો” તેવો ખોટો આક્ષેપ મૂકીને નકલી પોલીસે યુવક પાસેથી બળજબરીપૂર્વક રૂપિયા પડાવવાનો અને લૂંટવાનો પ્રયાસ કર્યો હતો. વગર નંબરની કારમાં આવેલા આ શખ્સોએ નકલી રોફ જમાવીને યુવકને ધમકાવવાનું શરૂ કર્યું હતું.
વગર નંબરની કારમાં આવી ધમકાવવાનો પ્રયાસ
નકલી પોલીસની આશંકા જતાં યુવકે સામનો કરવાનો પ્રયાસ કર્યો ત્યારે આરોપીઓએ ક્રૂરતા દાખવતાં કાર ચાલુ કરી દીધી હતી. યુવકે કાર રોકવા પ્રયાસ કરતાં તેને ગાડીના બોનેટ પર ઢસડીને સરેઆમ મારી નાખવાનો ભયાનક પ્રયાસ કરવામાં આવ્યો હતો. આ સમગ્ર ઘટના નજીકમાં લાગેલા સીસીટીવી (CCTV) કેમેરામાં કેદ થઈ ગઈ હતી. ઘટનાનો વિડીયો વાયરલ થતાં અને ફરિયાદ મળતાં જ વલસાડ પોલીસ વિભાગમાં દોડધામ મચી ગઈ હતી.