વાવ અને થરાદ પંથકમાં જન્માષ્ટમીના પાવન પર્વની ભારે શ્રદ્ધા અને ઉલ્લાસપૂર્વક ઉજવણી કરવામાં આવી હતી. નવરચિત ધરણીધર તાલુકાના ટડાવ ગામે પણ શ્રીકૃષ્ણ જન્મોત્સવ નિમિત્તે વિવિધ સાંસ્કૃતિક અને ધાર્મિક કાર્યક્રમોનું સુંદર આયોજન કરવામાં આવ્યું હતું. પવિત્ર તહેવારને લઈને સમગ્ર ટડાવ ગામમાં વહેલી સવારથી જ ભક્તિમય અને ઉત્સાહસભર માહોલ જોવા મળ્યો હતો.
આકાશી દ્રશ્યો સાથે રોમાંચક મટકી ફોડ
ટડાવ ગામના ઉત્સાહી યુવાનો દ્વારા જન્માષ્ટમી પર્વે વિશેષ મટકી ફોડ કાર્યક્રમ યોજવામાં આવ્યો હતો. યુવાનોએ એકબીજાના ખભા પર ચડીને અદભુત સાહસ સાથે માનવ પિરામિડ રચ્યો હતો અને ઊંચાઈ પર બાંધવામાં આવેલી મટકી સફળતાપૂર્વક ફોડી હતી. આ સમગ્ર મટકી ફોડ કાર્યક્રમના રમણીય આકાશી દ્રશ્યો (ડ્રોન વિઝ્યુઅલ્સ) પણ સામે આવ્યા હતા, જે સોશિયલ મીડિયા અને પંથકમાં ભારે આકર્ષણનું કેન્દ્ર બન્યા હતા.