છોટાઉદેપુર જિલ્લા સહિત સમગ્ર મધ્ય ગુજરાતમાં હાલ ચોમાસું જામ્યું છે, ત્યારે ભારે પવન સાથે પડી રહેલા વરસાદના કારણે ધરતી પર ઠેર-ઠેર ઝાડ અને વીજ થાંભલા પડી જવાની ઘટનાઓ બની રહી છે. આવી જ એક ઘટના સંખેડા પંથકમાં છોટાઉદેપુર-પ્રતાપનગર (વડોદરા) રેલવે ટ્રેક ઉપર બની હતી. પુનિયાવાંટ સ્ટેશન નજીકથી પસાર થતી રેલવે લાઈન પર એક વર્ષો જૂનું કદાવર લીમડાનું ઝાડ ભારે પવનના ઝાપટા સહન ન કરી શકતાં સીધું રેલવેના પાટા ઉપર જઈને પડ્યું હતું.
મુસાફરો 1 કલાક સુધી અટવાયા
વહેલી સવારે જ્યારે છોટાઉદેપુરથી પ્રતાપનગર તરફ જતી ટ્રેન આ રૂટ પરથી પસાર થવાની હતી, ત્યારે ટ્રેકના પાટા પર ઝાડ આડું પડ્યું હોવાનું ધ્યાને આવ્યું હતું. રેલવે ટ્રેક બ્લોક થઈ જતાં કોઈ અનિચ્છનીય ઘટના ન ઘટે તે માટે ટ્રેનને પુનિયાવાંટ નજીક જ લાઈવ સિગ્નલ પર રોકી દેવામાં આવી હતી. સવારના સમયે નોકરી-ધંધાર્થે વડોદરા તરફ જતાં સેંકડો મુસાફરો રસ્તામાં જ અટવાઈ પડ્યા હતા અને ટ્રેન લગભગ ૧ કલાક જેટલી મોડી પડી હતી.
