અમદાવાદ એન્ફોર્સમેન્ટ ડિરેક્ટોરેટ (ED) દ્વારા ડિજિટલ અરેસ્ટ સાયબર ફ્રોડના એક અત્યંત ચોંકાવનારા કેસમાં સ્પેશિયલ PMLA (પ્રીવેન્શન ઓફ મની લોન્ડરિંગ એક્ટ) કોર્ટમાં પ્રોસિક્યુશન ફરિયાદ (ચાર્જશીટ) દાખલ કરવામાં આવી છે. સીબીઆઈ (CBI) અને પોલીસ અધિકારી બનીને બે નિર્દોષ વરિષ્ઠ નાગરિકો સાથે કરોડો રૂપિયાની ઠગાઈ આચરવામાં આવી હોવાનો ED ની તપાસમાં ખુલાસો થયો છે. ED ની આ આકરી કાયદાકીય કાર્યવાહીથી સાયબર ઠગો અને નાણાંની હેરાફેરી કરતી સિન્ડિકેટમાં કંપારી છૂટી ગઈ છે.

CBI અને પોલીસ અધિકારી બની રૂ.2.95 કરોડ પડાવાયા

તપાસમાં સામે આવ્યું છે કે સાયબર ઠગોએ બે વૃદ્ધોને મની લોન્ડરિંગ અને ગેરકાયદેસર પ્રવૃત્તિઓમાં નામ હોવાનો ડર બતાવી ડિજિટલ અરેસ્ટ કર્યા હતા. ઠગોએ ખોટી ધરપકડની ધમકી આપીને બે વૃદ્ધો પાસેથી અનુક્રમે રૂ. 1.15 કરોડ અને રૂ. 1.80 કરોડ (કુલ રૂ. 2.95 કરોડ) મ્યુલ બેંક એકાઉન્ટ્સમાં ટ્રાન્સફર કરાવી લીધા હતા. પ્રાથમિક તપાસમાં 'Quality Fruit Traders' અને 'Shivam Charitable Trust' ના નામે ખોલેલા બેંક ખાતાઓનો આ ઠગાઈ માટે મુખ્યત્વે ઉપયોગ થયો હોવાનું બહાર આવ્યું છે.

50થી વધુ મ્યુલ એકાઉન્ટ્સ અને I4C પોર્ટલ પર 396 ફરિયાદો લિંક

ED ની તપાસમાં બહાર આવ્યું છે કે ઠગાઈની રકમને છુપાવવા માટે 50 થી વધુ મ્યુલ બેંક એકાઉન્ટ્સ મારફતે નાણાં અલગ-અલગ ખાતાંઓમાં ટ્રાન્સફર કરવામાં આવ્યા હતા. ગૃહ મંત્રાલયના I4C (ઈન્ડિયન સાયબર ક્રાઈમ કોઓર્ડિનેશન સેન્ટર) પોર્ટલ પર આ બેંક ખાતાઓ સાથે જોડાયેલી દેશભરમાંથી 396 સાયબર ક્રાઇમ ફરિયાદો સામે આવી છે. ઠગોએ આ રકમને રોકડ ઉપાડ, અલગ-અલગ આંગડિયા ચેનલો અને ક્રિપ્ટોકરન્સી મારફતે લોન્ડર કરીને ગાયબ કરવાનો પ્રયાસ કર્યો હતો.

સુરતમાં રૂ.38 લાખની સંપત્તિ એટેચ, વધુ તપાસ ચાલુ

આ સમગ્ર કૌભાંડમાં મની ટ્રેલના આધારે કાર્યવાહી કરતા ED એ સુરત ખાતે આવેલો રૂ. 30 લાખની કિંમતનો એક ફ્લેટ અને રૂ. 8 લાખની ત્રણ ફિક્સ ડિપોઝિટ (FD) મળીને કુલ રૂ. 38 લાખની સંપત્તિ એટેચ કરી છે. ડિજિટલ અરેસ્ટ કૌભાંડમાં સંકળાયેલા અન્ય મુખ્ય સૂત્રધારો અને નાણાંની આંતરરાષ્ટ્રીય હેરાફેરીના નેટવર્કને ભેદવા માટે ED દ્વારા વધુ ઊંડાણપૂર્વક તપાસ ચલાવવામાં આવી રહી છે.

ગુજરાતના વધુ સમાચાર વાંચવા માટે ક્લિક કરો