દિવાળીના પવિત્ર અને ઉત્સાહભર્યા તહેવારો નજીક આવતા જ શહેરોમાં રહેતા લોકો પોતાના વતન તરફ જવા માટે આતુર બન્યા છે. અમદાવાદ શહેરમાંથી તહેવાર મનાવવા માટે પોતાના વતન ગામે જવા માટે લોકોની ભારે ભીડ જોવા મળી રહી છે. શહેરના મુખ્ય એવા ગીતા મંદિર ST બસ સ્ટેશન ખાતે વહેલી સવારથી જ મુસાફરોનું ભારે માનવ મહેરામણ ઉમટી પડ્યું છે, જેના કારણે ડેપો પર ચારેબાજુ લોકો જ લોકો નજરે પડી રહ્યા છે.
ગીતા મંદિર ST ડેપો પર ખીચોખીચ ભીડ
દિવાળીના તહેવાર પર રજાઓ પડતા જ નોકરી કરતા યુવાનો, વેપારીઓ અને પરિવારો પોતાના વતન જવા માટે ગીતા મંદિર ST ડેપો પર પહોંચ્યા હતા. ડેપો પર મુસાફરોની ભારે ભીડના કારણે અફરાતફરી જેવું વાતાવરણ સર્જાયું હતું. પ્લેટફોર્મ પર આવતી બસોમાં સીટ મેળવવા માટે મુસાફરો વચ્ચે ભારે પડાપડી અને ધક્કામૂકીના દ્રશ્યો જોવા મળ્યા હતા. હજારોની સંખ્યામાં લોકો પોતાના સામાન સાથે બસની રાહ જોતા લાંબી કતારોમાં ઊભેલા નજરે પડ્યા હતા.