અમદાવાદની નિરમા યુનિવર્સિટીમાં મહિલા સુરક્ષાને લઈને નવો વિવાદ સામે આવ્યો છે. ગર્લ્સ હોસ્ટેલની સુરક્ષા વ્યવસ્થાને લઈને એનએસયુઆઈએ ગંભીર સવાલો ઉઠાવ્યા છે. વિદ્યાર્થી સંગઠનનો આક્ષેપ છે કે ગર્લ્સ હોસ્ટેલના સિક્યુરિટી ગાર્ડ દ્વારા વિદ્યાર્થીનીઓને જોઈને અયોગ્ય અને અભદ્ર વર્તન કરવામાં આવતું હોવાની ઘટના સામે આવી છે. આ મામલે સંગઠને હોસ્ટેલ નજીકનો વીડિયો રજૂ કરીને નિષ્પક્ષ તપાસની માંગ કરી છે.
ગર્લ્સ હોસ્ટેલ પાસેનો વીડિયો બન્યો ચર્ચાનો વિષય
એનએસયુઆઈ દ્વારા રજૂ કરવામાં આવેલા વીડિયોને લઈને યુનિવર્સિટી કેમ્પસમાં ચર્ચા શરૂ થઈ છે. સંગઠનનો દાવો છે કે વીડિયોમાં ગર્લ્સ હોસ્ટેલની આસપાસની સુરક્ષા વ્યવસ્થાને લઈને ગંભીર સવાલો ઉભા થાય છે. જોકે, વીડિયોમાં દેખાતી ઘટનાના સમગ્ર સંદર્ભ અને આક્ષેપોની સત્તાવાર તપાસ થવાની બાકી છે.
સિક્યુરિટી ગાર્ડના વર્તન સામે NSUIનો આક્ષેપ
એનએસયુઆઈનો આક્ષેપ છે કે વિદ્યાર્થીનીઓની સુરક્ષા માટે તૈનાત સિક્યુરિટી ગાર્ડનું વર્તન યોગ્ય ન હતું. સંગઠને સવાલ કર્યો છે કે જો ગર્લ્સ હોસ્ટેલની સુરક્ષા માટે જવાબદાર વ્યક્તિ સામે જ આ પ્રકારના આક્ષેપો થાય તો વિદ્યાર્થીનીઓની સુરક્ષા અંગે જવાબદારી કોની રહેશે?
CCTV અને સુરક્ષા વ્યવસ્થાની સમીક્ષા કરવાની માંગ
આ સમગ્ર મામલે એનએસયુઆઈએ ગર્લ્સ હોસ્ટેલ સહિત કેમ્પસની સીસીટીવી વ્યવસ્થાની તપાસ કરવાની માંગ કરી છે. સાથે જ સુરક્ષા ગાર્ડની કામગીરી, ડ્યુટી પેટર્ન અને મહિલા હોસ્ટેલની સુરક્ષા વ્યવસ્થાની સંપૂર્ણ સમીક્ષા કરવાની માગ કરવામાં આવી છે. યુનિવર્સિટી પોતાની સત્તાવાર તપાસમાં આ આક્ષેપોની હકીકત સ્પષ્ટ કરી શકે છે.
તાજેતરમાં પણ ચર્ચામાં આવી હતી યુનિવર્સિટી
નિરમા યુનિવર્સિટી છેલ્લા દિવસોમાં અન્ય એક વિવાદને લઈને પણ ચર્ચામાં આવી હતી. ટેક્નોફોરા 2026 કાર્યક્રમ દરમિયાન પ્રોફેસર એચ.કે. પટેલે એક વિદ્યાર્થીનો કોલર પકડ્યો હોવાનો વીડિયો વાયરલ થયો હતો. આ મામલે એનએસયુઆઈ સહિત વિદ્યાર્થી સંગઠનોએ તપાસ અને કાર્યવાહી કરવાની માંગ કરી હતી. યુનિવર્સિટીએ 3 સભ્યોની તપાસ સમિતિ બનાવી હતી અને 7 દિવસમાં અહેવાલ રજૂ કરવાનો નિર્ણય કર્યો હતો. યુનિવર્સિટી તરફથી જણાવાયું હતું કે પ્રોફેસર અને વિદ્યાર્થી બંનેએ એકબીજાને માફી માંગી હતી, જોકે તપાસ પ્રક્રિયા ચાલુ રાખવામાં આવી હતી.
આ પણ વાંચો : Kanpur: Instagramની દોસ્તી પ્રેમમાં બદલાઈ, 3 બાળકોની માતા 25 વર્ષની યુવતી સાથે રહેવા ઘર છોડીને ભાગી
