અમદાવાદ શહેરને ઝંઝોળી મુકનારી કરુણ ઘટનાને એક અઠવાડિયું પૂર્ણ થવા છતાં 9 વર્ષની બાળકી મનીષા સલાટનો કોઈ પત્તો લાગ્યો નથી. ગત શનિવારે ખુલ્લી ગટરમાં ખાબકેલી બાળકીની શોધખોળ માટે તંત્ર દ્વારા રેસ્ક્યૂ કામગીરી ચાલુ રાખવાનો દાવો કરવામાં આવી રહ્યો છે, પરંતુ સાત-સાત દિવસ વીતી ગયા છતાં કોઈ જ પરિણામ મળ્યું નથી. જેમ જેમ સમય વિતી રહ્યો છે તેમ તેમ માસૂમ બાળકીના પરિવારજનોની આશા ધૂંધળી બની રહી છે અને તેમની અસહ્ય પીડા અને ચિંતામાં સતત વધારો થઈ રહ્યો છે.
રેસ્ક્યૂ કામગીરીમાં વિલંબ અને પરિવારની આક્રોશભરી આશા
એક અઠવાડિયાથી પરિવારની આંખો ગટરના નાળા પર અટકેલી છે અને માસૂમ બાળકી સલામત મળી આવે તેવી પ્રાર્થના કરી રહ્યો છે. જોકે, તંત્ર દ્વારા હાથ ધરવામાં આવેલી સર્ચ કામગીરીની ધીમી ગતિ અને પરિણામ વગરના પ્રયાસો સામે પરિવારજનો અને સ્થાનિક લોકોમાં ભારે રોષ જોવા મળી રહ્યો છે. વિશાળ લશ્કર અને આધુનિક સાધનો હોવાનો દાવો કરતા મ્યુનિસિપલ કોર્પોરેશન અને ફાયર બ્રિગેડ પાસે આટલા દિવસો પછી પણ બાળકીની ભાળ મેળવવા અંગે કોઈ સ્પષ્ટ જવાબ નથી.
