અમદાવાદના કૃષ્ણનગર પોલીસ સ્ટેશન હદંતર્ગત આવતા સૈજપુર બોઘામાંથી કાયદો અને વ્યવસ્થાને શરમમાં મૂકે તેવી એક ક્રૂર ઘટના સામે આવી છે. 36 વર્ષીય સિક્યોરિટી ગાર્ડ કપિલભાઈ લુટે પર જૂની અદાવતની દાઝ રાખીને હુમલો કરવામાં આવ્યો હતો. આરોપીઓ દ્વારા સમાધાન કરવાના બહાને બોલાવી રાહુલ લુહાર સહિતના શખ્સો ત્યાં ધસી આવ્યા હતા. લોકોના ટોળાએ ભેગા મળીને યુવકને ગડદાપાટુનો માર માર્યો હતો તેમજ પટ્ટા વડે રસ્તા પર દોડાવી-દોડાવીને ફટકાર્યો હતો.

ભય ફેલાવવા વીડિયો વાયરલ કર્યો અને છેડતીની અફવા ફેલાવી

આ કૃત્ય આચરતી વખતે આરોપીઓ દ્વારા સમગ્ર હુમલાનો વીડિયો મોબાઈલ ફોનમાં રેકોર્ડ કરવામાં આવ્યો હતો. સ્થાનિક લોકો કે રાહદારીઓ વચ્ચે બચાવવા માટે ન આવે અથવા ભોગ બનનારની મદદ ન કરે તે માટે આરોપીઓએ જાહેરમાં એવી ખોટી અફવા પણ ફેલાવી હતી કે યુવકે કોઈની છેડતી કરી છે. આટલું જ નહીં, જો આ સમગ્ર મામલે પોલીસમાં ફરિયાદ કરવામાં આવશે તો જાનથી મારી નાખવાની ગંભીર ધમકી આપીને હુમલાખોરો નાસી છૂટ્યા હતા અને બાદમાં આ બદઈરાદાવાળો વીડિયો સોશિયલ મીડિયા પર વાયરલ કરી દીધો હતો.

કૃષ્ણનગર પોલીસની સત્વરે કાર્યવાહી: 7 આરોપીઓ ઝડપાયા

સોશિયલ મીડિયા પર આ ગુંડાગર્દીનો વીડિયો વાયરલ થતાં જ પોલીસ તંત્ર હરકતમાં આવ્યું હતું. વાયરલ વીડિયોની ગંભીરતાને ધ્યાનમાં લઈને કૃષ્ણનગર પોલીસ સ્ટેશનની ટીમે તાત્કાલિક ટેક્નિકલ સર્વેલન્સ અને બાતમીના આધારે સઘન તપાસ હાથ ધરી હતી. પોલીસે આ ગુનામાં સંડોવાયેલા મુખ્ય સૂત્રધાર સહિત કુલ 7 આરોપીઓની ધરપકડ કરી લીધી છે. પોલીસ દ્વારા આ તમામ સામે કાયદેસરની સખત ફોજદારી કાર્યવાહી હાથ ધરવામાં આવી છે અને અન્ય નાસી છૂટેલા શખ્સોને પકડવા માટેના ચક્રો પણ ગતિમાન કરવામાં આવ્યા છે.

ગુજરાતના વધુ સમાચાર વાંચવા માટે ક્લિક કરો