અમદાવાદના ઈસનપુર વિસ્તારના કુખ્યાત હિસ્ટ્રીશીટર મહંમદ કલીમ ઉર્ફે કલીમ ભૈયા પઠાણની ધરપકડ બાદ કાયદાકીય શિકંજો વધુ મજબૂત બન્યો છે. અમદાવાદ ક્રાઈમ બ્રાન્ચ દ્વારા તાજેતરમાં જ આ રીઢા ગુનેગારની ધરપકડ કરવામાં આવી હતી. આરોપીના ગુનાહિત ઈતિહાસ અને તેની સામે નોંધાયેલા વિવિધ ગંભીર ગુનાઓની ઊંડાણપૂર્વક તપાસ કરવા માટે ક્રાઈમ બ્રાન્ચની ટીમ દ્વારા તેને અમદાવાદની મેટ્રોપોલિટન મેજિસ્ટ્રેટ કોર્ટ સમક્ષ રજૂ કરવામાં આવ્યો હતો. કોર્ટ પરિસરમાં કલીમ પઠાણને લાવવામાં આવતા જ ચુસ્ત પોલીસ બંદોબસ્ત ગોઠવી દેવામાં આવ્યો હતો.
ક્રાઈમ બ્રાન્ચે માંગી કસ્ટડી, કોર્ટે આપ્યા રિમાન્ડ
આરોપી કલીમ ભૈયા પઠાણ પાસેથી અનેક ગુપ્ત વિગતો અને તેના ગુનાહિત નેટવર્કનો પર્દાફાશ કરવા માટે ક્રાઈમ બ્રાન્ચ દ્વારા કોર્ટ સમક્ષ પાંચ દિવસના પોલીસ રિમાન્ડની માંગણી કરવામાં આવી હતી. સરકારી વકીલ અને તપાસ અધિકારીઓ દ્વારા રજૂ કરવામાં આવેલી દલીલો તેમજ ગુનાની ગંભીરતાને ધ્યાનમાં રાખીને, મેટ્રોપોલિટન મેજિસ્ટ્રેટ કોર્ટે આરોપીના રિમાન્ડ મંજૂર કર્યા છે. કોર્ટે કલીમ ભૈયાના આગામી 7 જુલાઈ સુધીના પોલીસ રિમાન્ડ ગ્રાહ્ય રાખ્યા છે, જેથી પોલીસને તેની સઘન પૂછપરછ માટે પૂરતો સમય મળી રહે.