અમદાવાદ શહેરમાં હાલમાં પીવાના પાણીની કોઈ અછત ન હોવા છતાં, મ્યુનિસિપલ કોર્પોરેશન (AMC) દ્વારા વહીવટી શિસ્ત જાળવવા અને પાણીના બગાડને અટકાવવા માટે એક મહત્વનો અને કડક નિર્ણય લેવામાં આવ્યો છે. તંત્ર દ્વારા સ્પષ્ટ સૂચના આપવામાં આવી છે કે શહેરમાં જ્યાં પણ ગેરકાયદે પાણીના કનેક્શનો કે જોડાણો ધ્યાને આવશે, તેની સામે કોઈપણ પ્રકારની શેહશરમ રાખ્યા વગર આકરી કાર્યવાહી કરવામાં આવશે અને તાત્કાલિક ધોરણે આવા કનેક્શનો કાપી નાખવામાં આવશે.
કાર વોશિંગ સેન્ટર, પીજી અને હોટલો પર વિશેષ નજર
શહેરમાં મોટા પ્રમાણમાં પાણીનો વપરાશ કરતી વ્યાપારી જગ્યાઓ હાલ મનપાના વિશેષ રડાર હેઠળ છે. જેમાં ખાસ કરીને કાર વોશિંગ સેન્ટરો, પેઈંગ ગેસ્ટ (PG) હાઉસ, હોટલો અને મોટા વ્યાપારી સંકુલોનો સમાવેશ થાય છે જ્યાં નિયમો વિરુદ્ધ કે વગર મંજૂરીએ પાણીના જોડાણો મેળવવામાં આવ્યા હોય છે. આ સ્થળોએ પાણીનો બેફામ વપરાશ થતો હોવાથી તંત્ર દ્વારા સઘન તપાસ હાથ ધરવામાં આવી છે અને મનપાના ધ્યાને આવતી આવી તમામ ગેરકાયદે પ્રવૃત્તિઓ સામે કડક પગલાં ભરવાના આદેશ અપાયા છે.
