અમદાવાદ મહાનગરપાલિકા (AMC) ના મહેસૂલ અને વહીવટી વિભાગમાં આજે એક અભૂતપૂર્વ સ્થિતિ સર્જાઈ છે. સામાન્ય રીતે સરકારી કે અર્ધ-સરકારી નોકરી મેળવવા માટે યુવાનો તનતોડ મહેનત કરતા હોય છે, ત્યારે અમદાવાદ કોર્પોરેશનમાં ચાલુ નોકરીએથી 20 જેટલા કર્મચારીઓએ રાજીનામા આપી દેતાં સમગ્ર વહીવટી તંત્ર સ્તબ્ધ થઈ ગયું છે. મ્યુનિસિપલ કમિશનર કચેરીના સૂત્રોના જણાવ્યા અનુસાર, રાજીનામું આપનારા આ તમામ કર્મચારીઓ વર્ગ-3 ની કેડરના છે અને લાંબા સમયથી કોર્પોરેશનની વિવિધ શાખાઓમાં ફરજ બજાવી રહ્યા હતા.
શા માટે કર્મચારીઓએ છોડી નોકરી?
આ સામુહિક રાજીનામા પાછળ કોઈ આંતરિક વિવાદ કે તંત્રનો ત્રાસ નથી, પરંતુ કર્મચારીઓનો વ્યક્તિગત વિકાસ જવાબદાર છે. છેલ્લા કેટલાક સમયગાળામાં ગુજરાત ગૌણ સેવા પસંદગી મંડળ (GSSSB) અને રાજ્ય સરકારના અન્ય બોર્ડ દ્વારા લેવાયેલી વિવિધ સ્પર્ધાત્મક પરીક્ષાઓના પરિણામો જાહેર થયા છે. AMC ના આ 20 કર્મચારીઓ, જેમાં જુનિયર ક્લાર્ક અને સહાયક ટેકનિકલ સુપરવાઈઝર સામેલ છે, તેઓ આ સરકારી ભરતીઓમાં મેરિટ લિસ્ટમાં આવી ગયા છે. મહાનગરપાલિકાની નોકરી કરતાં રાજ્ય સરકારના સચિવાલય કે અન્ય વિભાગોમાં વધુ સારો પગાર સ્કેલ, પ્રમોશનની તકો અને કાયમી સિક્યોરિટી મળતી હોવાના કારણે આ કર્મચારીઓએ એકસાથે પોતાના રાજીનામા પત્ર સત્તાધારી મંડળને સોંપી દીધા હતા.
બે અધિકારીઓના VRS પણ મંજૂર
બીજી તરફ, આ ૨૦ કર્મચારીઓની સાથે-સાથે AMC માં ફરજ બજાવતા અન્ય બે સિનિયર અધિકારીઓએ વયમર્યાદા કે અંગત કારણોસર સ્વૈચ્છિક નિવૃત્તિ (VRS) ની માંગણી કરી હતી, જેને પણ તંત્ર દ્વારા સત્તાવાર મંજૂરી આપી દેવામાં આવી છે. એકસાથે 20 થી વધુ જગ્યાઓ ખાલી પડતાં કોર્પોરેશનના રોજના વહીવટી કામો પર આંશિક અસર પડવાની સંભાવના છે, ખાસ કરીને ચોમાસાની ઋતુમાં જ્યારે સુપરવાઈઝર અને ક્લાર્કની કામગીરી ખૂબ મહત્વની હોય છે. આ ખાલી પડેલી જગ્યાઓને ભરવા માટે AMC આગામી દિવસોમાં વેટિંગ લિસ્ટમાંથી ઉમેદવારોને બોલાવે છે કે નવી સીધી ભરતી પ્રક્રિયા હાથ ધરે છે તેના પર સૌની નજર રહેશે.
