અમદાવાદ શહેરમાં પાર્કિંગ ચાર્જમાં વધારો કરવાની દિશામાં અમદાવાદ મ્યુનિસિપલ કોર્પોરેશન દ્વારા કવાયત હાથ ધરાઈ છે. વર્ષ 2015-16માં નક્કી કરાયેલા પાર્કિંગના દરમાં ફેરફાર કરીને નવા દર લાગુ કરવાની દરખાસ્ત તૈયાર કરાઈ છે.જેમાં પાર્કિંગના સ્થળ, ઝોન, વાહનના પ્રકાર અને ટ્રાફિકની ગીચતાને ધ્યાનમાં રાખીને અલગ-અલગ દર નક્કી કર્યાં છે.દરખાસ્ત મુજબ, કેટલીક જગ્યાએ ટૂ-વ્હીલરનો એક કલાકનો ચાર્જ હાલના રૂ.5થી વધારીને રૂ.20 અને કારનો ચાર્જ રૂ.15થી વધારીને રૂ.40 સુધી કરવાનો પ્રસ્તાવ છે.
ઓન-સ્ટ્રીટ પાર્કિંગ માટે દર એકસરખા દર રખાયા
હાલ શહેરમાં ટૂ-વ્હીલર માટે પ્રથમ કલાકના રૂ. 5, કાર માટે રૂ. 15, મિડિયમ કોમર્શિયલ વાહન માટે રૂ. 50 અને હેવી કોમર્શિયલ વાહન માટે રૂ. 75નો ચાર્જ વસૂલાય છે. નવા દર અમલમાં આવશે તો વાહનચાલકોએ પાર્કિંગના સ્થળ અને રોકાણના સમયગાળા પ્રમાણે વધુ ચાર્જ ચૂકવવો પડી શકે છે. નવી દરખાસ્તમાં મલ્ટિલેવલ અને ઓન-સ્ટ્રીટ પાર્કિંગ માટે એકસરખા દર રખાયા છે.અહીં ટૂ-વ્હીલર માટે પ્રથમ કલાકનો ચાર્જ રૂ. 10, કાર માટે રૂ. 20, થ્રી-વ્હીલર માટે રૂ. 15 અને લાઇટ કોમર્શિયલ વાહન માટે રૂ. 50 સૂચવાયો છે.
