અમદાવાદ મ્યુનિસિપલ કોર્પોરેશનના હેલ્થ અને ફૂડ વિભાગે નાગરિકોના આરોગ્ય સાથે ચેડાં કરતા તત્વો સામે લાલ આંખ કરી છે.મસાલામાં થતી ભેળસેળ ડામવા માટે ફૂડ વિભાગની ટીમે એક સંયુક્ત ઓપરેશન હાથ ધરીને શહેરમાંથી આશરે 2000 કિલો જેટલો શંકાસ્પદ મસાલાનો જંગી જથ્થો ઝડપી પાડ્યો છે.તંત્રની આ અચાનક થયેલી કાર્યવાહીથી ભેળસેળિયા વેપારીઓમાં ભારે ફફડાટ વ્યાપી ગયો છે.
મસાલાના આ શંકાસ્પદ નેટવર્કની કડી મળી
આ સમગ્ર કૌભાંડનો ખુલાસો એક અગાઉની તપાસના આધારે થયો છે.ફૂડ વિભાગ દ્વારા અગાઉ લેવામાં આવેલા ગ્રેવીના સેમ્પલ લેબોરેટરી ટેસ્ટમાં ફેઈલ સાબિત થયા હતા.આ ફેઈલ થયેલા સેમ્પલના મૂળ સુધી પહોંચવા માટે હાથ ધરાયેલી સઘન તપાસ દરમિયાન અધિકારીઓને મસાલાના આ શંકાસ્પદ નેટવર્કની કડી મળી હતી. જેના આધારે ફૂડ વિભાગે જય માતાજી ટ્રેડર્સ નામના ઉત્પાદન એકમ પર દરોડા પાડ્યા હતા.જ્યાં મોટા પાયે આ મસાલા તૈયાર કરવામાં આવી રહ્યા હતા.