અમદાવાદ શહેરમાં ચોમાસા દરમિયાન પડેલા ભારે વરસાદ બાદ હવે નાગરિકો માટે નવી અને વિકટ મુશ્કેલી ઊભી થઈ છે. શહેરના અનેક વિસ્તારોમાંથી હજી તો પૂરેપૂરા પાણી પણ ઓસર્યા નથી, ત્યાં જ બિસ્માર રસ્તાઓની ગંભીર સમસ્યા સામે આવી છે. મ્યુનિસિપલ કોર્પોરેશન દ્વારા ચોમાસા પહેલાં રસ્તાના સમારકામ માટે જે મોટા-મોટા દાવા કરવામાં આવ્યા હતા, તે તમામ કામગીરી ધોવાઈ ગઈ હોય તેમ શહેરના અનેક માર્ગો પર મોટા-મોટા ખાડા પડી ગયા છે.
જીવરાજ ચાર રસ્તા પર ત્રણ-ત્રણ વાર ખોદકામ છતાં સ્થિતિ જસની તસ
શહેરના અત્યંત ધમધમતા એવા જીવરાજ ચાર રસ્તા પર જ રસ્તાઓ અત્યંત બિસ્માર હાલતમાં ફેરવાઈ ગયા છે. સ્થાનિકોના આક્ષેપ મુજબ, કોર્પોરેશન દ્વારા આ સ્થળે અગાઉ પણ ૩ વાર ખોદકામ કરીને ખાડા કરવામાં આવ્યા હતા, પરંતુ તે પછી કોઈ યોગ્ય અને ગુણવત્તાયુક્ત કામગીરી કરવામાં આવી નહોતી. તંત્રની આ અણઘડ કામગીરીના પરિણામે ચોમાસાનો પહેલો જ વરસાદ પડતાં રોડ ધોવાઈ ગયો છે અને વાહનચાલકો ત્રાહિમામ પોકારી ઉઠ્યા છે.