નવા વર્ષ નિમિત્તે સંગઠનની એકતા અને મજબૂતી દર્શાવવા માટે યોજાતા સ્નેહમિલન કાર્યક્રમોમાં જ અમદાવાદ ભાજપનો આંતરિક વિખવાદ ખુલીને સપાટી પર આવી ગયો છે. શહેરના ચાંદખેડા વોર્ડ ભાજપમાં ભારે ભડકો જોવા મળી રહ્યો છે, જ્યાં વોર્ડ સંગઠન અને અનુસૂચિત જાતિ (SC) મોરચા દ્વારા એકસાથે કાર્યક્રમ કરવાના બદલે અલગ-અલગ સ્નેહમિલનનું આયોજન કરવામાં આવતા રાજકીય વર્તુળોમાં ભારે ચર્ચા જાગી છે. ગઈકાલે યોજાયેલા વોર્ડ સ્નેહમિલન કાર્યક્રમમાં SC આગેવાનોની અવગણના કરવામાં આવી હોવાના ગંભીર આરોપ સાથે ચાંદખેડા વોર્ડના કાર્યકર્તાએ સોશિયલ મીડિયા પર પોતાનો બળાપો ઠાલવ્યો છે.
ગઈકાલે વોર્ડનું સ્નેહમિલન, SC આગેવાનોનું અલગ આયોજન
ચાંદખેડા ભાજપમાં સંકલનના અભાવ અને આંતરિક મતભેદોને કારણે વોર્ડ સ્નેહમિલન અને SC મોરચાના સ્નેહમિલનનું અલગ-અલગ આયોજન કરવામાં આવ્યું છે, જેણે સ્થાનિક સંગઠનની ખેંચતાણને ઉજાગર કરી છે. ગઈકાલે ચાંદખેડા વોર્ડનું સ્નેહમિલન યોજાયું હતું, જેમાં SC મોરચાના આગેવાનોની જાણીજોઈને અવગણના કરવામાં આવી હોવાનો આરોપ લાગ્યો છે.