દેશભરમાં લોહપુરુષ સરદાર વલ્લભભાઈ પટેલની જન્મજયંતિ એટલે કે ૩૧ ઓક્ટોબરના રોજ 'રાષ્ટ્રીય એકતા દિવસ' ની ઉજવણી કરવામાં આવી રહી છે, ત્યારે અમદાવાદ શહેર પોલીસ દ્વારા પણ આ પવિત્ર અવસરે વિશેષ અને ભવ્ય કાર્યક્રમનું આયોજન કરવામાં આવ્યું હતું. શહેરના જાણીતા જે.ડી. નગરવાલા પોલીસ સ્ટેડિયમ ખાતે યોજાયેલા આ કાર્યક્રમમાં દેશની અખંડિતતા અને રાષ્ટ્રીય એકતાના પ્રતિકસમા સરદાર સાહેબને યાદ કરીને શ્રદ્ધાંજલિ અર્પણ કરવામાં આવી હતી અને ખાખી વર્દીના જવાનો દ્વારા એકતાનો સંદેશ આપવામાં આવ્યો હતો.
અઢી હજારથી વધુ પોલીસ કર્મીઓ 'રન ફોર યુનિટી' માં જોડાયા
આ ઉજવણીના મુખ્ય આકર્ષણ તરીકે 'રન ફોર યુનિટી' (Run for Unity) નું ભવ્ય આયોજન કરવામાં આવ્યું હતું, જેમાં અમદાવાદ શહેર પોલીસ કમિશનર સહિતના ઉચ્ચ પોલીસ અધિકારીઓ અને અઢી હજારથી વધુ પોલીસ કર્મીઓ ઉત્સાહભેર જોડાયા હતા. આ દોડ કમિશનર કચેરીથી શરૂ થઈને દધીચી બ્રિજ સુધી યોજાઈ હતી. તમામ પોલીસ અધિકારીઓ અને જવાનોએ સાથે મળીને અંદાજે ૩ કિલોમીટર જેટલું અંતર દોડીને પાર કર્યું હતું, જેનાથી સમગ્ર વિસ્તારમાં દેશભક્તિ અને ઉત્સાહનો માહોલ છવાઈ ગયો હતો.