અમદાવાદના કૃષ્ણનગરમાંથી ચોંકાવનારી ઘટના સામે આવી છે. અહીં જુગારની પ્રવૃત્તિ ચાલતી હોવાની ચોક્કસ બાતમીના આધારે દરોડો પાડવા ગયેલી કૃષ્ણનગર પોલીસ સ્ટેશનની ટીમ પર સ્થાનિક તત્વો દ્વારા હુમલો કરવામાં આવ્યો હોવાની ઘટના પ્રકાશમાં આવી છે. કાયદાનો જરાય ખોફ ન હોય તેમ આરોપીઓએ પોલીસ કર્મચારીઓ સાથે ઉગ્ર બોલાચાલી કરીને ઝપાઝપી શરૂ કરી દીધી હતી. હુમલાખોરોએ પોલીસની કાયદેસરની કાર્યવાહીમાં સીધી રીતે રુકાવટ ઊભી કરવાનો ધૃષ્ટ પ્રયાસ કર્યો હતો.
રેડ દરમિયાન દારૂ, લેપટોપ અને મોબાઈલ જપ્ત
જુગારધામ પર પાડવામાં આવેલા આ દરોડા દરમિયાન પોલીસને ઘટનાસ્થળેથી માત્ર જુગારની સામગ્રી જ નહીં, પરંતુ અન્ય અનેક શંકાસ્પદ વસ્તુઓ પણ મળી આવી હતી. પોલીસ સર્ચ ઓપરેશન દરમિયાન ત્યાંથી વિદેશી દારૂની બોટલ, લેપટોપ અને મોબાઈલ ફોન જેવા ગેજેટ્સ મળી આવ્યા હતા. પોલીસને આશંકા છે કે આ લેપટોપ અને મોબાઈલનો ઉપયોગ ઓનલાઈન જુગાર અથવા ક્રિકેટ સટ્ટા જેવી ગેરકાયદેસર પ્રવૃત્તિઓ માટે કરવામાં આવી રહ્યો હતો. પોલીસે આ તમામ મુદ્દામાલ કબજે કરીને કાયદેસરની જપ્તીની પ્રક્રિયા હાથ ધરી છે.